بولا وجيه يكتب: ادعم مرسال.. مصر الحلوة
المصري بيتعرف وقت الشدة، وقت الضيقة تلاقي كتفه في كتفك ومابيتخلاش، حتى لو هو في أشد الاحتياج، تلاقيه واقف جنبك وبيحاول يدعمك بكل اللي في إيده حتى لو كان آخر مليم معاه، حاجة كدا مش هتلاقيها ولا هتشوفها غير في بلدنا وبس.
خلال ساعة وشوية تابعت فيها لايف كان شغال على صفحة موقع القاهرة 24 لدعم مؤسسة مرسال ولدعم الأستاذة هبة راشد -صاحبة المؤسسة- ورأيت دعمًا كبيرًا من غير فرق، سواء من فنانين أو كتاب أو صحفيين أو رجال أعمال أو حتى نواب مجلس شعب، أو حتى ناس عادية شبهنا، ناس بتجمعنا وبتجمعهم المحبة والدعم وحب الخير.
حب الخير اللي مش محتاج لمجهود ولا حاجات كتير، محتاج بس إن قلبك يحس بغيرك، وأنك تقدَّر النعم الكثيرة الموجودة حواليك حتى لو بسيطة، وتحاول تشاركها مع غيرك علشان نوصل في الآخر لنتيجة حلوة، النتيجة دي إن مايبقاش في مصر حد محتاج أو تعبان ومش لاقي دعمًا.
حسيت في اللايف وفي كومنتات الناس إن اللايف نفسه هو اللي "مرسال" للقلوب أن الخير لسه في الدنيا، وإن الدنيا لسه فيها حاجات حلوة، وإن لسه في أشخاص قلوبها على بعض، وإن حتى في أحلك الظروف بتلاقينا جنب بعض علشان نسند بعض من غير تفكير في أي حاجة غير بس أن الحب يجمعنا، وأن الخير يعم في بلدنا الحبيبة مصر.
شكرًا لصديقي وأستاذي وأخي الأكبر محمود المملوك على اللايف اللي حقيقي مليان رسائل مهمة ومبهجة، شكرًا يوسف سعد على تعبك ومجهودك، شكرًا للأستاذة هبة راشد التي أظهرت كم الخير اللي موجود فينا، وأخيرًا شكرًا لكل حد بيدعم وما زال بيدعم مرسال علشان تستمر.
