أحمد موسى عن هزيمة قطر: والله لو إحنا بنلاعب الإكوادور كنا كسبناها.. وإلغاء الهدف كارثة
علق الإعلامي أحمد موسى، على خسارة قطر أمام الإكوادور بهدفين في المباراة التي جمعت العنابي بنظيره الأمريكي الجنوبي، في افتتاح بطولة كأس العالم 2022 بقطر، التي تُقام لأول مرة في المنطقة العربية.
الإكوادور كان ممكن يكسب خمسة صفر
وأكد موسى، خلال برنامجه "على مسئوليتي"، المذاع على قناة صدى البلد، مساء اليوم: الإكوادور كان ممكن يكسب خمسة صفر اليوم، وله هدف صحيح لم يحتسب، ومعرفش الحكم حسبه إزاي تسلل، وفرصة قطر ضاعت اليوم، منتخب قطر مكنش موجود.
وأضاف أحمد موسى: قطر عندها ماتشين السنغال وهولندا وفرصة قطر إنها تكمل للدور اللي بعده صعب جدًا، ويعتبر خروج مبكر من الدور الأول، ومحدش اتكلم عن الهدف الملغي في الأستوديو التحليلي، ليه مش عارف.
وتابع أحمد موسى: إلغاء هدف الإكوادور كارثة، وحارس الإكوادور كنت عايز أعرف شكله طوال الماتش مش عارف، ومصدش ولا كورة أساسًا عشان مفيش ولا كورة راحتله.. وحرام منتخبنا مرحش كأس العالم، ولو إحنا بنلاعب الإكوادور كنا غلبناها والله.
وسقط منتخب قطر، مستضيف بطولة كأس العالم 2022، في فخ الهزيمة أمام منافسه الإكوادور بهدفين دون رد، ليُصبح أول مستضيف للبطولة يتعرض للخسارة في مباراته الافتتاحية.
وبهذه النتيجة، حصد منتخب الإكوادور، أول ثلاث نقاط في كأس العالم 2022، ليحتل المركز الأول في المجموعة الأولى مؤقتًا، فيما تذيل منتخب قطر صاحب الأرض ومستضيف البطولة، مجموعته دون أي نقاط ودون أي أهداف.
