مواطن يشكو من منع سفارة السويد منحه تأشيرة ويتهمها بالعنصرية: رفضوني عشان مصري.. فاتحين في بلدنا ليه؟
اتهم مواطن مصري يدعى آدم جونيور، السفارة السويدية في القاهرة بالعنصرية، موضحا أنه قدم على زيارة للسويد وتم رفضها، رغم أنه مسافر دائم زار العديد من الدول حول العالم، ولا يوجد أي سبب منطقي لهذا الرفض.
قدم آدم على رحلة للسويد لمدة 12 يوما، لتكون هذه أول رحلة له لهذه الدولة، ووقع اختياره عليها بسبب سرعة الموعد، لأن دول مثل إسبانيا وفرنسا يجب عليه الانتظار فترة طويلة، ولأنه يسافر بهدف السياحة، فيريد زيارة كل الدول الأوروبية وفق تصريحات لـ القاهرة24.
وأكد: أنا مسافر دبي الخميس، لأني ما صدقت الباسبورد رجع من السفارة، وبعدها هروح قطر لحضور كأس العالم.
مواطن يتهم سفارة السويد بالعنصرية
وقال: الفايل بتاعي مفيهوش أي حاجة تستدعي الرفض، وسافرت قبل كده هولندا وإسبانيا والولايات المتحدة الأمريكية وروسيا وتايلاند والعديد من البلدان الأخرى، وأنا في الأساس مسافر دائم، وعندي قناة على يوتيوب خاصة بالسفر.
وأضاف: الفايل بتاعي مفيهوش أي حاجة خالص ناقصة أو مش مظبوطة وأنا متأكد من ده، لأني ساعدت حوالي 10 من صحابي إنهم يسافروا قبل كده دول كتيرة وعارف تفاصيل السفر، وقدمت على السويد رغم إني عارف إنها صعبة، بس وضعي كويس ومعنديش حاجة أخاف منها.
وسافر آدم آخر عامين 18 سفرية إلى دول مختلفة مثل: روسيا، تايلاند، كولومبيا، تركيا، ألبانيا، دبي، السعودية، لبنان، كما سافر من قبل الولايات المتحدة الأمريكية مرتان، وإلى إسبانيا وهولندا.
وتابع: أنا سافرت كتير والدنيا تمام معايا، وأنا عارف إن اللي حصل ده ملوش تفسير غير العنصرية، لأن السبب اللي رفضوا عشانه هو إني مصري، وقالوا لي الأكل في مصر غالي، رغم إني مقدم في الفايل حساب وإن وضعي كويس، وإني شريك في مدرسة خاصة، وكشفين حساب، وشهادات أرصدة في البنك، ومعنديش مشكلة في الجزئية ده خالص.
ليه ترفضني عشان مصري؟
أنت فاتح في مصر ليه سفارة ؟ عشان ترفضني لأني مصري؟.. يتساءل جونيور، مستكملا حديثه قائلا: أنت اتفاجئت دلوقتي إني مصري، مانت عارف إني مصري وأنا بقدم جواز السفر ليكم، وأنا معنديش أي سبب من كل الأسباب، غير أنهم عندهم شكوك أني ممكن مرجعش لأني مصري، وده قمة العنصرية، وأنا كنت في أسبانيا وأمريكا، لو مكنتش عايز أرجع مكنتش رجعت.
واختتم حديثه قائلا: مش فاهم إيه وجهة النظر ديه.. أنا جواز سفري القديم جددته في 2019، وهاعمل واحد جديد لأن مفيهوش مكان من كتر الأختام.
