بعد أيام من ارتدائه.. نورهان قنديل تخلع الحجاب: أنا في ابتلاء شديد.. لعنة السوشيال ميديا أصابتني
نشرت نورهان قنديل، البلوجر وأخصائية التغذية، صورة لها، عبر صفحتها الخاصة على موقع إنستجرام، بدون ارتداء الحجاب، وذلك بعد مرور أيام قليلة على إعلانها ارتدائه.
نورهان قنديل تخلع الحجاب
وكتبت نورهان: مش عارفة ليه كل ده حصلي، بس أنا فى ابتلاء شديد ومعنديش تفسير ولا تبرير، بس أنا كنت بمر بمرحلة حزن وضعف شديدة من قبل لبسي للحجاب وقلبي وكل حاجة فيه كانت بتحركني ناحية الخطوة دي علشان أبقى أقوى لنفسي ولبناتي وشغلى وربنا وحده بس هو اللي عالم ضميري ونيتي.
وأضافت: بس النتيجة إني بقيت أضعف بكتير، والخطوة دي بقت محتاجة مني قوة مش عندي، أنا أكيد حزينة إني مقدرتش أكمل في حاجة بحلم بيها من سنين، وبدعى ربنا كل يوم إنه يختم حياتي بيها، وبدعي ربنا من قلبي يحببني في نفسي في الحجاب الصحيح اللي مقدرتش أعمله، وحزينة أكتر إني بعلن ضعفي وتشوشي واضطرابي اللي غلبني وسيطر عليا ومش عارفة موصلني لفين.
وواصلت نورهان خلال المنشور: آسفة طبعا طبعا آسفة إني دخلتكوا معايا في متاهة قرار شخصي، بس هو لأنه حاجة الواحد لازم يكون فخور بإنه يعلنها، الحجاب ملهوش أي دعوة بأي توتر أنا بعيشه، بالعكس أنا عارفة إنى أجمل بكتير وأنا لابساه، بس في فرق كبير بين إني أتخلى عنه وبين إني مش عارفة ألبسه بالشكل اللي يخليني قوية وواثقة وأد المسئولية، أو ده التفكير اللي للأسف بقى مسيطر عليا واتخلل لقلبي، ومش هحمل الناس طبعا مسئولية حاجة، بس أنا حاسة إني بمر بأزمة كبيرة وأكيد كل حاجة خير وده يقينى بربنا.
لعنة السوشيال ميديا أصابت قلبي
واستكملت: بس اللي اتكشفلي في الفترة البسيطة دي كان أكتر من تحملي ولأول مرة أركز في حجم القسوة اللي في القلوب، مش عارفة ليه بس أظن لعنة السوشيال ميديا أصابت قلبي، وبقيت حاسة إنه مش قادرة على كمية الصراعات اللي بعيشها بسببها ولا مبسوطة بأني شخصية عامة، أنا هعتبر كل اللي هيحصل من هجوم طبعا ده في ميزان حسناتي لأني أكيد محتاجة ده.
متابعوها يتضامنون معها
وعلق أحد متابعيها على منشورها، قائلًا: ربنا يردك إليه ردا جميلا زعلت أوي، فيما كتت نيرة رضا: ربنا يعينك يا حبيبتي كل الدعم يا قمر.
وقالت متابعة أخرى: الجهاد في حد ذاته إن شاء الله يكون ثواب ربنا يهدينا جميعا، بينما كتب حساب باسم عبير: الله يفتح عليك بالهداية والإيمان ويردك له ردا جميلا.
نورهان تعلن ارتداءها الحجاب
وفي نهاية الشهر الماضي، نشرت نورهان قنديل، صورًا لها مرتدية الحجاب، وقالت: الحمد لله ربنا هدى قلبي، إني أقرب منه بخطوة كمان، يا رب تقبل محتاجة منكم دعوة حلوة وربنا يهدينا جميعا، ويقوينا على نفوسنا وينعم علينا باللى يريح قلبنا.. ومازلت لا أعلم ماذا فعلت من خير وسط ذنوبي، ليفيض عليَّ ربي بكل هذا الكرم لأكون غريق في النعم، الحمد لله.
