هند عاكف تبكي خلال حديثها عن أزمة مهرجان القاهرة: ماجتليش دعوة وكلمت حسين فهمي ما ردش عليا
كشفت الفنانة هند عاكف، تفاصيل أزمتها في مهرجان القاهرة السينمائي بدورته الـ 44، ومحاولة منعها من دخول حفل الافتتاح، مشيرة إلى إنها كانت تحمل دعوة لحضور المهرجان أهداها لها أحد زملائها.
وقالت هند عاكف، خلال تصريحات تلفزيونية: أنا مجاليش دعوة من إدارة المهرجان، ينفع الكلام دا لفنانة مصرية بتشتغل من وهي عندها 4 سنين؟، وأنا كنت بدخل المهرجان دا والدعوة كانت بتكون داخل السيارة، وكان معايا بالفعل دعوة من زميل قالي أني مقولش لحد أنه بعتلي الدعوة عشان هم ممكن يبعتولي، وكنت نازلة بالدعوة من البيت.
وأضافت باكية: أنا دمعتي نزلت علشان صعبان عليا تاريخي وتاريخ عائلة عاكف اللي أنا شايلاه طوال عمري ومحافظة عليه، قُلت استحالة هيعملوا معايا موقف زي دا، لأن ليا تاريخ أيًا كان كبير أو صغير، بغض النظر أني بعدت شوية، وأنا بعدت علشان كنت بعمل حاجة لصالح بلدي ولصالح المواطن المصري.
وأكدت هند عاكف، إنها ستعاتب الفنان حسين فهمي رئيس المهرجان، قائلة: سأعاتب الأستاذ حسين فهمي كرئيس مهرجان، والمهرجان دا بيتي المفروض وهي جاهزة ومحدش يمنعها، أولًا لأن احنا فنانين.
واستكملت هند عاكف: وثانيًا لتجنب المشاكل، ودا مهرجان بلدنا، تعالي أتفرجي على العائلات داخل المهرجان، الدعوات لو كانت راحت للفنانين بس كانت كل الناس هتدخل، مع احترامي الأول الفنان ثم البلوجر.
هند عاكف
وروت هند عاكف، تفاصيل محادثتها مع إدارة مهرجان القاهرة السينمائي، قائلة: السنة دي عملت اتصال لـ إدارة المهرجان سألتهم الدعوات اتطبعت ولا لأ، قالولي هنشوف ومش عارفين اسمك في الكشف ولا لأ، قُلت لهم أنا جيت السنة اللي فاتت وبعد إذنكم شوفوا الموضوع، بلغوني بعد كدة إن اسمي مش في الكشف وإنهم بلغوا الأستاذ حسين.
وواصلت هند عاكف حديثها: كلمت الأستاذ حسين، ومردش عليا، مع إنه هنأني على عودتي وأنا رديت على تهنئته، ولما مردش بعتله رسالة إني عايزة أقابله في إدارة المهرجان، وفيه بيننا علاقة زمالة وهو بيحب عائلة عاكف أوي، ولما تولى رئاسة المهرجان هنأته.
وأردفت: رُحت الإدارة علشان أقابل أستاذ حسين فهمي، مالقتهوش وقابلت بنت في الإدارة قالتلي أستاذ حسين قال إن هند عاكف ملهاش في المهرجان، سألتها إنتي متأكدة من اللي بتقوليه؟ أشك إنه يقول كده، ردت عليا إنتي كنتي لابسة إيه السنة اللي فاتت؟، يعني هي هند عاكف اللي كانت لابسة فرعوني وبتتكلم عن حضارة بلدها هي اللي عملت مشكلة، واللبس المثير بتاع كل الناس اللي كانوا موجودين في المهرجان كانت عادية؟ دا حتى أستاذ حسين عمل الدريس كود بسببهم.
وتطرقت هند عاكف في حديثها، إلى الفنان أشرف زكي نقيب المهن التمثيلية، والتي أشارت أحد موظفي إدارة المهرجان بـ أنه مسؤول عن دعوات الحضور بالمهرجان، موضحة: جاتلي بنوتة تانية قالتلي لو فيه مشكلة الدكتور أشرف زكي يحلها، لأنه هو المسؤول عن دعوات الفنانين، وكلمت الدكتور أشرف مردش، وبعدين هو كلمني، وسألته على دعوة المهرجان وقالوا إن حضرتك بتبعت كشف بالاسماء وأنا عايزة أحضر المهرجان لأني كنت بحضره من أيام أستاذ سعد الدين وهبة.
وكشفت هند عاكف، عن تسجيل صوتي للفنان أشرف زكي نقيب المهن التمثيلية، قال خلاله: مفيش الكلام ده، وكلمني حد من طرف مكتب أستاذ حسين فهمي، وبيفاصلني في دعوات مجلس الإدارة وبيقولي هنبعتلك دعوة ليك لوحدك، قولتله لأ يا فندم الدعوة دي استفيدوا بيها أحسن، وأن لا علاقة للنقابة بدعوات المهرجان إطلاقًا.
