سعادتي انتهت بعد وفاة بنتي وأتمنى أقدم شخصية الرئيس محمد نجيب.. أبرز تصريحات باسم سمرة التلفزيونية
حل الفنان باسم سمرة، ضيفًا على أحد البرامج التلفزيونية وتحدث خلال الحوار عن زملائه بالوسط الفني، وكواليس أعماله.
ونعرض لكم أبرز تصريحات باسم سمرة التلفزيونية في السطور التالية:
- نفسي أعمل شخصية تاريخية وهي محمد نجيب وعملت قبل كده عبد الحكيم عامر والراجل ده اتظلم والتاريخ أنصفه لما اتعمل قاعدة باسمه من أكبر القواعد العسكرية في مصر.
- مفيش أدوار بتتفصل عليا وفي ناس بيتعمل لها أدوار مخصوصة وأفلام تتعمل لناس معينة وتتصرف عليها كتير وينقصني العلاقات والذكاء الاجتماعي وعندي علاقات ولكن مش بعرف استغلها وعمري ما برفع سماعة التليفون وأكلم حد على دور.
- عمري ما قلت إن في مؤامرات ضدي في الوسط الفني واللي مش مصلحته أنى اطلع هو اللي موهبته قليلة ويخاف إني أظهر أخد منه الليلة.
- نظرتي للحياة تغيرت بعد وفاة بنتي والبهجة والسعادة معدتش موجودة والحزن وجعه مش بيخلص.
- عندي بنتين بـ100 راجل والبنات حنينة على أبوهم ورزقهم واسع، وأتمنى في زوج بناتي يكون حنين ويتقي الله في البنت عشان لو معملش كده هطلع عينه.
- نيللي كريم مكنتش عارفه تقول كلمتين في مسلسل ذات وأنا مليش فضل عليها، ولكن كنت أنا وانتصار منطلقين انطلاقة عظيمة.
- نيللي كريم بتشتغل على نفسها وبعدين بقت نجمة جميلة.
- محمد رمضان أخويا الصغير وهو في كوارث دلوقتي وعنده مشاكل كتير ولكن هو موهب جدا ولو ركز هيبقى أحلى وأحلى ويكون نجم عالمي.
- رفضت دور جمال عبد الناصر وقدمه الفنان السوري جمال سليمان وهو أستاذ كبير ولكن اللهجة أن عبد الناصر يطلع سوري كانت كارثة.
