إيمان الحصري بعد عودتها لـ مساء dmc: علاقتي بالمشاهدين متقطعتش وحاسة إني بشتغل لأول مرة
أعربت الإعلامية إيمان الحصري عن سعادتها، بعودتها لتقديم برنامج dmc من جديد، اليوم، موجهةً رسائل شكر للجمهور والعاملين بالقناة على استقبالهم لها.
وقالت إيمان الحصري منذ قليل: بشكر كل الناس اللي استقبلتني أول ما دخلت القناة شكرًا جزيلًا، وكنا محضرين كلام كتير لكوني بعيدة عن الإعلام حوالي سنة ونص وعن الشاشة بسبب الظروف اللي عديت بيها الفترة اللي فاتت، لكن علاقتي بكتير جدًا من المشاهدين موجودة، بيبعتولي في رسائل ودعوات ويطمنوا عليا، متقطعتش العلاقة أبدًا على مدار السنة ونص وكانت قوية جدًا الفترة اللي فاتت، وكنت بستمد من كلماتهم الطيبة والدعوات طاقتي وفرقت معايا بشكل كبير.
وأضافت إيمان: شكرًا على كم الحب والدعم وكانت أزمة وعدت على خير، ويمكن الدعوة الوحيدة اللي المفروض الناس تتمناها لبعض هي الصحة والستر والسعادة يارب للجميع.
وتابعت: شكرًا لحضراتكم جميعًا، وبشكر زميلتي إنجي القاضي اللي كانت معاكم على مدار السنة الماضية وبتمنالها التوفيق في قناة القاهرة الإخبارية وبشكر زميلتي وأختي جاسمين طه زكي اللي كانت موجودة في الفترة الأولى اللي غبت فيها عن البرنامج.
وأردفت إيمان الحصري: عندي إحساس وكأني بشتغل أول مرة النهاردة هوا، يمكن عشان بقالي فترة بعيدة، كأننا بنبتدي مع حضراتكم بداية جديدة وأحاول نكون صوتكم ونقدم كل الموضوعات اللي تهمكم.
