حورية فرغلي لـ القاهرة 24: أنا في النص مش عارفة أكمل اللي عاوزاه في التمثيل ولا أعيش حياتي
قالت الفنانة حورية فرغلي، إنها تعرضت لظلم كبير في حياتها؛ بسبب العمليات التي خضعت لها والتنمر الذي عانت منه.
وأضافت حورية فرغلي لـ القاهرة 24، قائلة: أنا مش بتعرض غير للظلم في حياتي، في العمليات والمرض، والناس اللي بطلت تكلمني وتشغلني، ومحدش هامُّه بمثّل كويس ولا لأ، لكنهم شبهوني بمايكل جاكسون، وقالوا مناخيرها شبه أبو الهول، وأنا زعلانة إن محدش بيقول إني ممثلة شاطرة، لكنهم بيقولوا شكلها عامل إزاي وعاملة عمليات تجميل ولا لأ، وحطوا صورتي أنا وأبو الهول وقالوا ما الفرق، رغم إن حاجة تشرفني إنهم يشبهوني به.
حورية فرغلي تكشف نيتها في ارتداء الحجاب
وعن نيتها في ارتداء الحجاب قالت حورية فرغلي: حجيت 7 مرات وعلاقتي بربنا كويسة ومش بسيب الصلاة، وبدعي ربنا إنه يديني القدرة على الحجاب لأن نفسي فيه.
واستكملت: أنا مش عندي عيلة ولا زوج ولا أولاد أنشغل بيهم، ولا أنا كملت اللي نفسي فيه في التمثيل ولا اللي نفسي فيه في الدنيا، وربنا حرمني من الخلفة.. أنا في النص مش عارفة أكمل اللي عاوزاه في التمثيل ولا عارفة أعيش حياتي.
وأردفت: أتمنى من ربنا إنه يقول لي هيحصل إيه.. هل هكمل في التمثيل وهقدم كل الأدوار اللي بتمناها ولا هقابل شريك حياتي اللي مش هيهمه مناخيري بايظة ولا لأ، ولا هيهمه أنا حلوة ولا وحشة ولا عجزت.
