عمرو أديب: الاعتداء على طواقم التمريض والأطباء لن ينتهي
علق الإعلامي عمرو أديب، على واقعة الاعتداء على طاقم التمريض بمستشفى قويسنا المركزي بالمنوفية، قائلًا: الطواقم الطبية والأطباء الاعتداء عليهم مش هيخلص وهيفضل كده.. واللي بيحصل كتير.
وأضاف الإعلامي عمرو أديب، خلال برنامجه الحكاية مساء اليوم السبت: خلوني أقولكم الحكاية حسب تقرير المستشفى، أولًا ضابط طيار كان واخد مراته في عيادة طبيبة أمراض ونساء اللي بتتابع الحمل بتاع هذه السيدة، الست دي حامل في الشهر التالت أو الرابع، والطبيبة نصحتهم إنهم يروحوا المستشفى أفضل عشان حالتها.
وأكمل أديب: اللي بقوله من تقرير المستشفى، الساعة 4 وتلت دخلت السيدة ومعاها عددا من أقاربها ودخلوا على الاستقبال وقالوا محتاجين طبيب عشان حالتها صعبة، كان فيه اتنين دكاترة، وكانوا موجود في حالات قيصرية وفي هذا الوقت طلب منهم الحالة اللي في الطوارئ يشوفها لحد ما دكتور يطلع من الطوارئ.
وتابع: بدأوا يعملوا ليها تحاليل دم وأشعة والأشياء الإجرائية، شوية وجه طبيب من الاتنين المودجودين، قال ايه الحكاية لقى صوت خناقة بين الاتنين الأسرة وأطقم التمريض، في نفس الوقت طبعا جوزها وصل ومعاه ناس وابتدى يحصل الاشتباكات المؤسفة اللي شفناها.
وأكمل أديب: ضرب الأطقم الطبية بيحصل كتير في بلدنا.. طبعا التسعة اللي تم ضربهم داخل المستشفى راحوا عملوا محضر بالاعتداء عليهن.
وكانت نقابة أطباء المنوفية قد أكدت دعمها الكامل لكل الإجراءات التي اتخذتها إدارتي مستشفى قويسنا ومستشفى شبين الكوم التعليمي لحفظ حقوق هيئة التمريض والأطباء، وجميع العاملين في المنشأتين وتعاونها الكامل مع نقابة التمريض في هذه الواقعة، وضرورة عقاب المعتدين لوضع حد حاسم لمنع تكرار مثل هذه الحوادث التي تؤثر بالسلب على مقدمي الخدمة الصحية، وتحبط أي توجهات لتطويرها وتحسينها.
