شريف منير لـ القاهرة 24: التمثيل مهنة صعبة جدًا.. علشان كده أجري غير أجرك وحياتي غير حياتك
قال الفنان شريف منير، إن التمثيل من أصعب المهن، مشيرًا إلى أن الفنانين يمرون بظروف صعبة، وقد تصل ساعات التصوير إلى 24 ساعة دون توقف، مؤكدًا أنهم يقدمون رسالة حقيقية.
وأضاف شريف منير خلال ندوة تكريمه بالقاهرة 24: التمثيل مهنة صعبة جدًا، وأحيانًا بنصور بملابس صيفي وإحنا في عز الشتاء وبنكون متلجين.
بنلبس شتوي في عز الصيف عشان التصوير
كما استعاد شريف منير كواليس تصوير فيلمه حكايات الغريبن قائلًا: أنا ومحمد منير وحسن الإمام كنا واقفين على هضبة المقطم لابسين صيفي في عز الشتاء، وبنلبس شتوي في عز الصيف، إلى جانب استحضار الإحساس، في الفيلم ده كنت بعيط وفضلت يومين عندي صداع.
وأردف قائلا: أحمد زكي كان من مدرسة المعايشة، ولما الشخصية تطير منه بيخبط دماغه في الحيط، والممثلين في هوليوود بعد الدور بيروحوا لدكتور نفساني، وممكن ييجي لنا أوردر الساعة 2 صباحا، وممكن تسيب ابنك سخن أو عنده مشكلة في المدرسة والمدرسة تقول علينا مستهترين، لكن أنت بتقعد تحت البطانية مبسوط وبتتفرج وأنا متبهدل في الشوارع علشان كده أنا أجري غير أجرك وحياتي غير حياتك.
واستكمل: إحنا بنشتغل 24 ساعة متصلين زي ظابط المباحث ووكيل النيابة، ممكن الساعة تلاتة الصبح يقوم على جريمة قتل ويلبس في عز الشتا وينزل يبص على الجثة ويفكر في القضية لأنه لازم يجيب حق اللي اتقتل، وإحنا في التمثيل علشان بنلعب شخصيات كتير الموضوع بيكون مرهق، علشان كده بتمنى أن الدخلاء على المهنة واللي عاوزين شهرة يمشوا علشان ده تعب إحنا بنعمل رسالة بجد.
