شريف منير: صعبان عليا إن مسلسل إيجار قديم هيخلص.. وحريص على دخول البيوت بـ أعمال محترمة
أعرب الفنان شريف منير، عن حزنه بسبب انتهاء تصوير مسلسل إيجار قديم، مشيرًا إلى أنه مسلسل عائلي حصل على إشادات الجمهور خاصة وإنه يحرص على تقديم أعمال ذات قيمة.
وقال خلال ندوته بـ القاهرة 24: أنا صعبان عليا إن مسلسل إيجار قديم هيخلص، وهو مسلسل عاش مع الناس والناس عاشوا معاه، والتعليقات اللي سمعتها على المسلسل بصراحة أثرت فيا جدًا، لأن كل الناس بتجمع إن المسلسل جمعهم تاني أمام شاشة التليفزيون وبنتفرج وإحنا مرتاحين.
وتابع: مسلسل إيجار قديم عائلي ومش بيقدم حاجة فيها خدش للحياء أو تضايق حد، وده بيبقى جوايا وأنا بسعى له دائمًا، لأن ببقى حريص إني داخل بيوت الناس دون إستأذان، ولازم لما أدخل البيوت أكون راجل محترم وكويس ويبقى عندي قضية أقدمها، وحتى لو بعمل حاجة ضحك للضحك مش شرط يكون فيه قضية، يعني لو هتكلم مع المشاهد من باب المتعة لازم أكون بحترم عقله ووجوده هو وأسرته أمام الشاشة، علشان ميجيش مشهد وطفل يسأل والده عليه، ده بيحصل في السينما لأن أنت بتقطع تذكرة بـ إرادتك وبتدخل وأنت اللي هتشوف، وبيكون عندك علم من قبلها وبتبقى قادر تحدد أنت هتشوف إيه.
مسلسل إيجار قديم
مسلسل إيجار قديم، هو آخر أعمال الفنان شريف منير، وشارك فيه إلى جانب شريف منير مجموعة كبيرة من الفنانين منهم: محمد الشرنوبي، صلاح عبد الله، فيدرا، ميمي جمال، هشام إسماعيل، حازم سمير، حنان سليمان، بسمة داوود، ولأول مرة في الدراما التلفزيونية إلهام وجدي، والعمل من تأليف عمرو الدالي، وإخراج طارق رفعت، وإنتاج كريم أبو ذكري بمشاركة الشركة المتحدة للخدمات الإعلامية.
