التحقيقات تكشف كيفية استغلال المتهمين لـ فتاة في تهريب الآثار المسروقة من متحف جامعة سوهاج | خاص
لا تزال قضية سرقة متحف آثار جامعة سوهاج تشغل الرأي العام، بعد تمكن 4 أشخاص بينهم طالبان ووالد أحدهما وفتاة، بسرقة 59 قطعة أثرية من المتحف، عن طريق قيام الطالبين بتغطية كاميرات المراقبة، والتسلل إلى المتحف، وكسر الصناديق الزجاجية باستخدام أجنة حديدية، بينما تنتظرهم الفتاة في الخارج بسيارتها، وقيام الوالد بالتصرف في القطع.
سرقة آثار متحف جامعة سوهاج
القاهرة 24 ينفرد بنشر تحقيقات القضية، حيث استدعت جهات التحقيق؛ الفتاة المتهمة وتدعى م.أ، تبلغ 20 سنة - طالبة، لسماع أقوالها في اتهامها بالاشتراك مع طالبين ووالد أحدها في سرقة 59 قطعة أثرية من المتحف، بأن انتظرتهم خارج سور الجامعة بسيارتها، ونقلت المسروقات بعيدا عن الجامعة وسلمتها للمتهم، وجاءت أقوالها كالآتي:
س: متى وأين حدث ذلك؟
ج: أنا تقابلت مع المتهم نبيل يوم الخميس الصبح الموافق 20 أكتوبر 2022 في الجامعة عند كلية العلوم، وبعدها الساعة 5 وربع كلمني وقالي أجيله بالعربية جوة الجامعة، وأنا رحتله في نفس الوقت واداني الحاجة اللي كانت معاه، وقالي استنيني على الكورنيش، وجالي ورمى السجادة في النيل، وأخد الشنطتين اللي كان سايبهم في العربية، ويوم الجمعة كلمني على الواتساب وقالي نتقابل عند شارع البحر، ويوم السبت بالليل شفت الخبر على النت ويوم الأحد امبارح كنت في الجامعة وكلمته فقالي إنه في مكتب الأمن.. فأنا شكيت فيه، وكنت هروح أبلغ تاني يوم.. بس في نفس اليوم بالليل الشرطة جات خدتني.
س: من كان برفقتك آنذاك؟
ج: يوم الخميس لما المتهم كلمني الساعة 5 وربع وقالي تعالي بالعربية جوه الجامعة، وأنا كان معايا في العربية أصحابي، وكانوا معايا لما المتهم الأول حط الحاجة في الشنطة بتاعة العربية، وكانوا معايا لما قابلناه على الكورنيش، وأخد الحاجة بتاعته ومشي.
س: أين تقابلتي تحديدا مع المدعو ن.ك، بداخل الجامعة عقب اتصاله بكي وطلب حضورك إليه؟
ج: أنا الأول كنت فاكراه كلمني علشان يحط البودرة بتاعت الطين اللي بنستخدمه في الكلية بالعربية، فأنا رحتله الأول عند الأوضة اللي بنحط فيها الطين اللي هي جنب مكتب شئون الطلاب، ولما ملقتهوش هناك اتصلت بيه، فقالي إنه قدام باب الكلية اللي عند طلعة البدروم، فأنا رحت على هناك لقيته واقف على البسطة بتاعة السلم قدام مدخل الكلية.
س: وما الحالة التي أبصرتي عليها المتهم ن.ك، لحظة وصولك لمكان انتظاره لكي؟
ج: أنا لاقيته واقف على البسطة بتاعة السلم اللي عند مدخل الكلية، وكان معاه شنطتين، وكان شكله مش طبيعي، وتصرفاته غريبة، ولما وقفت راح جه وفتح شنطة العربية بتاعتي راح حط فيها الشنطتين اللي كانوا معاه، وبعد كدة طلع السلم وجاب جزء من سجادة قديمة ملفوفة ومُتربة وحطها في شنطة العربية برضه، وقالي استنيني عند الكورنيش على النيل.
س: وما هي طبيعة ووصف الأشياء التي كانت بحوزة المتهم ن.ك، وقت تقابلك معه؟
ج: كان معاه شنطة سوداء مربعة حجمها متوسط، وكان معاة شنطة تانية كبيرة شوية زي شنط الجيم، وكان معاه حتة من سجادة قديمة وملفوفة على حاجة ومليانة تراب.
س: وهل تبينتي ماهية الأشياء الموجودة بداخل تلك الحقائب وتلك القطعة من السجاد؟
ج: لا معرفش إيه اللي فيهم.
وقررت محكمة استئناف سوهاج، إخلاء سبيل الطالبة م. أ بالفرقة الثالثة كلية التربية النوعية، ةالمتهمة في واقعة سرقة متحف كلية آثار جامعة سوهاج، بكفالة مالية قدرها 20 ألف جنيه.
