أبرزها التحضير للجزء الثالث من الفيل الأزرق.. ملخص تصريحات نيللي كريم في مهرجان البحر الأحمر السينمائي
حلت الفنانة نيللي كريم ضيفة جلسة حوارية بمهرجان البحر الأحمر السينمائي الدولي، في مدينة جدة بالسعودية، والتي أدارها أنطوان خليفة والسعودي ياسر السقاف.
وقالت نيللي كريم، خلال الجلسة الحوارية: أنا بحب المخرجين الجداد جدًا، ودايما وأنا في لجنة التحكيم بسأل هل ده مخرج أول مرة ولا لأ، لأني بحب أشجع أي حد داخل المجال جديد، ويمكن أنا في بداياتي ملقتش تشجيع أوي ومكنتش أعرف إيه الصح من الغلط، لذلك بحب أشجع أي حد داخل المهنة جديد وأساعده حتى لو بنصيحة أو بكلمة.
وأضافت نيللي كريم: إحنا كنا جيل جديد وحاليا جيل متوسط وبعد كدا هنبقى جيل قديم، فلازم حبًا للفن يحصل تجديد في الثقافة والأفكار والعمر والصناعة نفسها.
التحضير للجزء الثالث من الفيل الأزرق
وتطرقت نيللي كريم في حديثها، عن المخرج مروان حامد، وقالت: اشتغلت معاه في الفيل الأزرق الجزء الأول والتاني، مروان بيدور على الروايات والأفكار من خارج الصندوق، لذلك أنا بحب أعماله جدا، وهو حاليًا بيجهز للجزء الثالث من الفيلم.
وأضافت: المخرجة كاملة أبو ذكري اشتغلت معاها أعمال كتير جدًا ومهمة في مسيرتي زي فيلم واحد صفر، ثم مسلسل سجن النساء، ومسلسل بـ 100 وش، وكاملة أبو ذكري علمتني يعني إيه سكريبت ويعني إيه مخرج يشتغل مع الكاتب عشان يطلع العمل بشكل مختلف، ويعني إيه مخرج يشتغل مع ممثل فيطلع بشكل رائع.
وأعربت الفنانة نيلي كريم عن عشقها للسينما رغم قلة أدوارها السينمائية، حيث قالت: مشتغلتش كتير في السينما وسبب قلة أدواري هو إني مبلاقيش سيناريو مناسب، وأنا لسه ملقتش العمل السينمائي اللي أشتغله بشغف.
آخر أعمال نيللي كريم
يذكر أن آخر أعمال الفنانة نيلي كريم كان مسلسل فاتن أمل حربي، الذي عرض في رمضان 2022، والمسلسل من إخراج محمد جمال العدل وتأليف إبراهيم عيسي وشارك فيه شريف سلامة وهالة صدقي ومحمد الشرنوبي.
