محمد الغيطي عن تسارع أحداث مسلسل الضاحك الباكي: كنت هنتحر وأرمي نفسي من برج الجزيرة
كشف المؤلف محمد الغيطي السر وراء تسارع أحداث مسلسل الضاحك الباكي، مؤكدًا أنه لم يكن أمامه حل آخر بسبب ضيق الوقت وحدود الميزانية.
وقال محمد الغيطي خلال ندوة الضاحك الباكي بنادي الصيد: أنا كنت هنتحر وأرمي نفسي من فوق برج الجزيرة لما طلبوا مني في البداية مسلسل الضاحك الباكي يبقى ١٥ حلقة فقط، لأن المسلسل أحداثه كتير وكان صعب تقديمه في 15 حلقة فقط، ومكنش قدامنا حل وبحمد ربنا أننا قدرنا نقدمه بالشكل دا والجمهور اتبسط.
وأضاف الغيطي: قلت خلاص هحط العمل دا في الدرج ومكنش عندي أمل المسلسل يطلع للنور وبحمد ربنا إني عملت المسلسل أخيرًا وشركة المتحدة تبنتني، ومحمد فاضل عمدة الإخراج وتحمس يرجع بعد 10 سنين بالضاحك الباكي دا وسام على صدري وأنا عرفت مخرجين كتير ومشوفتش عقل زي محمد فاضل.
صعوبات تصوير مسلسل الضاحك الباكي
وفي سياق متصل، كشف المخرج محمد فاضل صعوبات تصوير مسلسل الضاحك الباكي، مشيرًا إلى أن المسلسل نصف ميزانية مسلسلات رمضان.
وأضاف: إحنا معذورين لأنه مسلسل تاريخي من 100 سنة ومفيش ولا شيء موجود حاليًا والدنيا اتغيرت والمعالم دي مبقتش موجودة ولا الشوارع ولا التماثيل، والمسارح مبقتش موجودة وإيجار اليوم الواحد 7 ساعات فقط بـ 150 ألف جنيه في اللوكيشن التاريخي ودي مشاكل الأعمال تاريخية في مصر أن محدش بيساعدنا.
واستكمل محمد فاضل: كل المسلسلات بقت بتدور في كومباوند وشقة مفيش غير جزيرة غمام عملوا ديكور محترم بـ٨ مليون وأحنا محتاجين دعم الدولة وبطالبهم يخففوا الأسعار علينا.
