الشركة تكشف حقيقة الواقعة والبلوجر تروي التفاصيل.. القصة الكاملة للعثور على فأر داخل علبة كشري سيد حنفي | خاص
قال محمد عبد المنعم، مسؤول العلاقات العامة بشركة سيد حنفي، إن واقعة الفأر الذي تم العثور عليه داخل علبة كشري، التابعة للمحل، حقيقية وحدثت منذ 5 أشهر.
الواقعة من شهر 6
وأضاف عبد المنعم في تصريحات خاصة لـ القاهرة 24: اللي حصل بالظبط، إن الموضوع المتداول ده، من شهر 6 اللي فات، واحنا بالفعل أخدنا اجراء قانوني ضد الشخص اللي عمل كده.
وتابع: وده اللي خلاه يمسح البوست في شهر 6 اللي فات، والموضوع انتهي عند كده والموضوع مع مباحث الإنترنت، ومتسجل للشخص ده مكالمات معانا وهو بيبتزنا، وأنه عاوز تعويض وحاجات زي كده.
وأوضح أن الإدارة غير مهتمة، لأنها اتخذت كافة الإجراءات القانونية، تجاه الشخص الذي يحاول ابتزاز الشركة، بالإضافة إلى أشخاص آخرين يحاولوا التشهير بالشركة، منوهًا: الصورة المنتشرة، حتى فيها فاتورة الأوردر من شهر 6 اللي فات.
البلوجر صاحبة الواقعة لم تتواصل معنا
وأكد أن البلوجر ندى الشافعي، لم تتواصل مع الشركة، حيث إن الواقعة لا ترتبط بها، إلا أنها قامت بنشر الصورة أيضًا، مثلما فعل الكثيرين، دون التأكد من حقيقة الأمر، موضحًا: أنا كتبتلها، ووضحتلها علي البوست نفسه، وفي الرسائل على الخاص، ولم يتم الرد لأنها مش صاحبة المشكلة الأساسية نهائي.
وأشار إلى أنه تم إبلاغ مباحث الإنترنت، منذ شهر يوينو الماضي، ولدينا التسجيلات الصوتية، لمحاولات الابتزاز، وتم تسليمها إلى المباحث.
واستطرد قائلًا: معمول محضر رسمي، لمحاولة التشهير بينا، والناس اللي بتشير في الوقت الحالي، والبلوجر مش صاحبة الموضوع للأسف، واحنا عمالين نتلقى رسايل واتصالات كتير جدًا بتبتزنا، وكلهم بيقولوا إنهم صحاب المشكلة بحثا عن التعويض.
من جانبه قالت البلوجر ندى الشافعي، في تصريحات خاصة لـ القاهرة24: أنا عرفت من حد من صحابي إنه لقى فأر، في علبة سيد حنفي، وقررت أنشر البوست عندي وأحذر الناس، وقررت إني هكمل في الإجراءات وهرفع قضية.
وجاء ذلك، بعدما نشرت الشافعي، عبر صفحتها الخاصة على فيس بوك، صور لعبوة كشري سيد حنفي، وبها فأر صغير، وقالت: ايه ده، عشان بجد تبطلوا تكلوا من بره تاني، أكل الشارع ده قرف، فار فالكشري انتوا متخيلين، لا حول ولا قوه الا بالله، لا تعليق، كشري سيد حنفي.
