شُفت سيدنا محمد واتغيرت 360 درجة.. أبرز تصريحات حنان شوقي التلفزيونية
حلت الفنانة حنان شوقي، ضيفة على أحد البرامج التلفزيونية، وتحدثت خلال اللقاء عن فترة غيابها عن الساحة الفنية ومشوارها الفني، بجانب الحديث عن حياتها الشخصية.
ونعرض لكم أبرز تصريحات حنان شوقي التلفزيونية:-
- أنا رميت الدينا ودوست عليها وبما فيها، وقررت أشتري نفسي وقلبي وروحي.
- في رمضان ختمت القرآن وأنا قاعدة على السرير أنا شفت ليلة القدر، أنا شفت سيدنا النبي يقظة مش منام، ودي غيرتني 360 درجة، اتهديت زي ما ربنا عاوز في كل شيء.
- أنا بقدس الزواج، والزواج فيه كل أسماء الله.
- الزواج عملية جامدة جدا وأنا بحبها وحساها جوايا، ولو محستهاش في الحياة بجد يبقى قلتها أحسن، وأنا لازم أبوس إيد جوزي وأبوسه وأقوله عايز حاجة مني؟.
- أنا كتلة حب متحركة على الأرض، وأنا حياتي كلها حب وقلبي مش بينبض غير بالحب بس الحب الحقيقي.
- أنا بحب الحب المتبادل، واللي اتقدمولي كان حبهم كاذب وربنا كان بيبن لي، والبني آدم بيبان من موقف أو كلمة أو حركة، وأنا حساسة جدا وقلبي رباني بحس باللي بيقولي بحبك بجد.
- أنا عايزة أتحب حب حقيقي لا يتجزأ، علشان لما نعجز نفضل نحب بعض، وبتمنى يكون فيه ود ورحمة وحنية، ولو مفيش كده يبقى قلته أحسن.
- لما دخلت عالم السوشيال ميديا لقيت كله بيقول رجلين حنان بعد مشهد الكوتشينة والشورت الأصفر، حسيت إن الناس دي بتاجر ومفيش فن، وعلشان الناس المريضة نفسيا يقولوا رجلين حنان شوقي، وشهوتهم هي اللي بتخليهم يشوفوا المشهد ده.
- بعد مشهد الكوتشينة والشورت الأصفر، كنت باخد صور فوتوغرافيا ومرة واحدة لقيت رجلي اتلوت وجالي تمزق في الأربطة، وساعتها أستاذ عادل إمام قال إني خدت عين.
