دوللي شاهين: عشت مع طليقي 5 سنين وإحنا منفصلين.. الإغراء نابع من شخصيتي وطريقة لبسي.. والرجالة بيعتمدوا عليا | حوار
تُعرف بجرأتها الصادمة للبعض، وتلاحقها الانتقادات منذ بدايتها في مجال الغناء ثم التمثيل، وارتبط اسمها بإثارة الجدل، ولكن دائمًا تدعم المرأة في أعمالها بعد ما مرت بالعديد من الصعوبات، ولعل أبرزها الخيانة والطلاق، وخلال حوارها مع القاهرة 24 أكدت الفنانة دوللي شاهين أهمية استقلالية المرأة وعدم الاعتماد على الرجل، كما تحدثت عن علاقتها بالمخرج خالد يوسف، والتي حققت نجاحا باهرا معه في فيلم ويجا.
وكشفت دوللي شاهين تفاصيل أغنيتها الجديدة الملكة، بجانب الحديث عن فترة طلاقها من زوجها وبقائهما بنفس المنزل ورأيها في فكرة المرأة المستقلة.
في البداية حدثينا عن فكرة كليب الملكة، وبخاصة أنه يدور حول فكرة المرأة المستقلة ومن تأليفك.
-فكرة الكليب جاتلي من التيك توك؛ لأني شوفت بنات كتير بيعملوا فيديوهات عن فكرة المرأة المستقلة وقد إيه بتكون تعبانة وشقيانة في حياتها على سبيل الهزار، وأكتر الرجالة اللي بتعرفهم بيكونوا مش قد المسؤولية ودي نفس الفكرة بتاعت الكليب بتاعي وبقول فيها إنه حان الوقت الست تدور على حد يريحها، وبالفعل ستات كتير في مصر والدول العربية وحول العالم بقوا بيعملوا فيديوهات عن الموضوع من زمان، ومن هنا حبيت أتناول الفكرة بشكل لايت وكوميدي، وأنا أول حد يغني عن الموضوع.
وما هو تعليقك على حالة الجدل المُثارة حول موضوع الكليب.. وهل رأيتِ في حياتك نماذج من السيدات يبحثن عن رجل من أجل المال؟
-الجدل شيء طبيعي حول أي عمل جديد ولو مفيش ضجة مش هينجح وهيمر مرور الكرام، وكمان السبب إني بطرح فكرة أول مرة حد يتطرق لها وهي الصراع ما بين رغبة السيدات في الاستقلال ماديًا ومعنويًا وعلى كافة المستويات وما بين رغبتها في الراحة والاعتماد على راجل في حياتها، وأنا شفت نماذج كتير موجودة دلوقتي ناجحات بسبب وجود رجل ثري أو مشهور والبنات بيسألوا نفسهم هل الصح أعتمد على راجل ولا أعتمد على نفسي؟
ومن وجهة نظرك.. هل تؤمنين بالاعتماد على الرجل أم الاعتماد على نفسك فقط؟
-أنا شخصية مستقلة من وأنا بنت عندي 13 سنة وكنت بشتغل ومعتمدة على نفسي كليا، وعمري ما اعتمدت على راجل بالعكس الرجالة في حياتي بيعتمدوا عليا، ومن وجهة نظري شايفة الست متقدرش تحقق كيانها وهي معتمدة على راجل؛ لأن أي حاجة هتعملها هيكون له الفضل إنما لو كانت ست زيي وزي ستات كتير مستقلات أي حاجة بيحققوها الفضل بيرجع لهم ولتعبهم وإصرارهم ومجهودها ولـ ربنا ولكن مش لـ حد تاني.
تتعرضين للعديد من الانتقادات مع كل كليب.. هل تتعمدين إثارة الجدل من حيث الملابس أو الموضوع من أجل لفت الانتباه؟
-أنا مش برد على التعليقات والنقد اللي موجود من أول يوم بدأت فيه في الوسط الفني وهما مصممين يتكلموا على لبسي وأنا بشوف دي حاجات عادية اللي عايز يتكلم براحته ولكن أنا مش بثير الجدل، ولكني بدور على الفكرة الجديدة وإلا مش هكون بقدم فن وهكون موجودة وخلاص، ومينفعش الفن يكون عن الحب والارتباط والانفصال فقط، الفن لازم يتطرق لمواضيع كتير مهمة واللي قدمته كان موضوع مهم واخدته في حتة تانية وأنا طول عمري معملتش ولا أغنية مالهاش رسالة حتى لو استفزت بعض الناس دي مش مشكلتي أنا بقدم حاجات مختلفة ومواضيع غير تقليدية.
تربطك علاقة جيدة بالمخرج خالد يوسف منذ فيلم ويجا.. هل هناك فرصة للتعاون بينكما مرة أخرى؟
-خالد يوسف له فضل كبير عليا في فيلم ويجا وهو من الناس القليلة اللي بيهتم بالعمل مش بالشخص وبيطلع أعماله على أكمل وجه وأتمنى نتعاون تاني لأن ويجا من أحسن أعمالي.
وهل خالد يوسف هو صاحب الفضل في دخولك مجال التمثيل أم الفضل لنفسك فقط؟
-محدش له فضل عليا غير ربنا وأنا كنت عاملة كليب مومو عيني وهو شافني في الأغنية وطلبني للدور، ولكن بالطبع له فضل في نجاحي وتقديمي للناس بشكل مختلف كـ مطربة وممثلة والدور كان من أجمل الأدوار بالنسبة ليا، وهو مش بيظلم حد على حساب حد، وأنا أتظلمت في أفلام كتير بعده لصالح فنانين تانيين عشان المخرجين بيهتموا بعلاقاتهم الفردية أكتر من العمل نفسه، ولكن خالد يوسف بيطلع أي ممثل بأحسن شكل.
وما سبب قلة أعمالك في الدراما والتلفزيون؟ وهل الغناء أبعدك عن التمثيل؟
-السر وراء قلة أعمالي أني عمري ما فكرت في الانتشار ولا قولت إني بعمل أي حاجة وكل حاجة، لا أنا لازم أعمل الفن اللي يعجبني ولو قريت نص ومعجبنيش مش بعمله، ببساطة، والموضوع مش بالكم ولكن بالنوعية وإني أقدم حاجة حلوة تسيب أثر عند الجمهور زي ويجا وتتح ونمس بوند، إنما معملش فيلم أو مسلسل ويمر مرور الكرام.
وهل تصنيفك كـ فنانة إغراء كان ظلمًا لكِ؟
-أنا مش فنانة إغراء ولكن صنفوني كدا بناءً على شخصيتي لأني بلبس على الموضة والبعض شايفين إن لبسي زيادة وبالتالي كلمة إغراء أطلقت عليا بسبب شخصيتي وليس أعمالي، وفيه فنانات كتير قدموا إغراء زي هند رستم وسعاد حسني وهما أهم علامات في تاريخنا الفني مع إني شايفاها أعمال مثيرة وليست إغراء، وأنا مقدمتش أغراء غير في فيلم ويجا وشايفاه عمل رومانسي وغير مثير إنما أدواري الأخرى كانت لايت كوميدي.
وهل توافقين على المشاركة في فيلم به مشاهد جريئة أو حميمية؟
-الأفلام الجريئة مبقتش موضة ولا بقت سادة أو مطلوبة والسينما كلها اتغيرت في العالم مش بس الوطن العربي وراحت في منطقة تانية، بس لو اتعرض عليا مش هرفض ولكني مش هقدم مشاهد حميمية، غير كدا مفيش اعتراض.
العديد من النساء يعشن مع شركائهن بعد الطلاق.. هل مررتِ بنفس التجربة؟ أم الطلاق كان نهاية العلاقة؟
-أنا بالفعل مريت بالتجرية دي وأنا ووالد بنتي عشنا مع بعض 5 سنين بعد الطلاق بدون زواج ولكن منفصلين، وكنت أنا في دور وهو في دور ومفيش علاقة بيننا وكانت عنده ظروف تمنعه يسيب البيت.
وأخيرًا.. ماذا تحضرين الفترة المقبلة؟
-بحضر لـ أغنيتين واحدة هبدأ أصورها الأيام اللي جاية رومانسية وواحدة تانية درامية.
