اعترافات منة شلبي في قضية المخدرات: أنا بدخن فيب ومليش في الممنوع | انفراد
كشفت تحقيقات النيابة العامة في قضية الفنانة منة شلبي المتهمة بحيازة مخدرات والمحالة للمحاكمة الجنائية لمعاقبتها على ما أُسند إليها من إحرازها جوهر الحشيش المخدِّر بقصد التعاطي في غير الأحوال المصرَّح بها قانونًا، أنها كانت فى مدينة نيويورك لحذور مهرجان فني.
اعترافات منة شلبي في قضية المخدرات
وقالت الفنانة منة شلبي، خلال التحقيقات بعد القبض عليها: أنا كنت مسافرة نيويورك علشان أحضر مهرجان إنتر ناشونا لامي أورد، ووصلت مطار القاهرة وعديت على الجمارك وأنا خارجة وكان معايا 3 شنط والدنيا كانت زحمة وأنا حطيت الشنط اللي معايا على السير علشان يتشاف فيها إيه ولاقيت واحد من اللي واقفين في الجمرك بيقولي معاكي سيجارة إلكترونية، فأنا قولتله أنا بدخن فيب وكنت بفتح الشنطة علشان أوريله الفيب فلاقيت واحد تاني جه وقالي إحنا هنفتح بيقة الشنط نشوفها.
تحقيقات قضية منة شلبي
ونفت الفنانة منة شلبي فى التحقيقات اتهامها بحيازة مخدر الحشيش وقالت: محصلش، أنا وافقت إن الراجل التاني يفتح الشنطة وقولتله اتفضل وقعد يقلب في الشنط وبعدين جه واحد ثالت كان بيتفتش معاهم وأنا طلعت الفيب السجاير الإلكترونية وواحد منهم قالي ممكن تقعدي شويه ووداني أوضة في الجمارك قعدت فيها شوية والشنط كانت معاهم في الوقت ده وبعد شوية لاقيت ناس كتير وظباط مطلعين علبة ميكب لونها أخضر بيقولولي إن دي فيها ماريجونا فقولتله مفيش الكلام، ده مش صح وده ميكب عادي فلقيته بيقولي معاكي كوكايين، قولتله أنا مش بشرب الحاجات دي أصلا، وبعدين قالولي طيب استني شوية، وبعدين أنا بقيت سامعه کلام کثیر بره وبعد ساعتين تلاتة لاقيتهم بيقلولي اطلبي المحامي بتاعك، فبقولهم إيه اللي حصل قالولي إنتي معاكي ماريجوانا، وبعدين قالي إنتي هتتعرضي على النيابة، وبعدين وأنا قاعدة لاقيت أخبار نازله إني أنا مقبوض عليا ومعايا مخدرات، وفضلت هناك لما جيت هنا واتعرضت على النيابة.
وتابعت منة شلبي في التحقيقات، أن ضبطها في مطار القاهرة كان يوم 25 / 11 /2022 صباحا حوالي الساعة 10.30 صباحا بمطار القاهرة الدولي.
وسألت النيابة العامة الفنانة منة شلبي حول سبب ومناسبة تواجدها بالمطار، أكدت الفنانة المتهمة، أنها كانت عائدة من رحلة سفر من نيويورك من مهرجان كانت تحضره هناك.
وبحسب بيان صدر من النيابة العامة ظهر اليوم، كشفت فيه النيابة أنها أقامت الدليلَ تجاه المتهمة من شهادة خمسة شهود على الواقعة، وما توصلَّت إليه تحريات الشرطة، وما ثبت بتسجيلات آلات المراقبة بمحلِّ ضبطها، فضلًا عمَّا أسفر عنه فحص المعمل الكيماويّ للمضبوطات المعثور عليها بحوزتها.
محاكمة الفنانة منة شلبي
وكانت النيابة العامة قد استكملت تحقيقاتها بعد ضبط المتهمة بالاستماع لشهادة خمسة من العاملين بمطار القاهرة الدوليّ، والتي كان حاصلها أن فحص حقائب المتهمة بجهاز الأشعة أثناء إنهائها الإجراءات الجمركية ظهر خلاله وجود كثافات عضوية بداخلها، فتم تفتيشها تفتيشًا دقيقًا أسفر عن العثور على موادّ مخدِّرة بالحقائب، فأُلقي القبض على المتهمة، وضُبط ما بحوزتها من مخدِّرات، وقد شاهدت النيابة العامة بتسجيلات آلات المراقبة دخول المتهمة المنطقة الجمركية والعثور على المضبوطات داخل حقائبها، وأثبت تقرير المعمل الكيماوي أنَّ المضبوطات تحوي جوهريْنِ مخدريْنِ هما الحشيش والقِنَّب المدرجيْنِ بالجدول الأول من جداول قانون المخدرات.
كما شهِد مُجري التحريات حول الواقعة بصحة ضبط المخدرات بحوزة المتهمة وحيازتها لها بقصد التعاطي.
