فتاة إعلانات التسعينيات.. نسرينا تكشف حقيقة تعرضها للاعتداء بـ مياه النار
كشفت الفنانة نسرينا الشهيرة بـ إعلاناتها في التسعينيات، حقيقة تعرضها للاعتداء بـ مياه النار، بجانب الحديث عن سبب ابتعادها عن الوسط الفني.
وقالت نسرينا في تصريحات تلفزيونية، مساء اليوم الخميس: أنا طول عمري بيطلع عليا شائعات، وقالوا إني اتجوزت وجوزي اعتدى عليا ورمى على وشي مياه نار، والكلام دا غير حقيقي، وقالوا كمان إني اتجوزت ملياردير مع إن زمان مكنش فيه مليارديرات كان آخرنا مليونيرات.
وواصلت نسرينا: بعض الناس في الوسط الفني قالوا إني سافرت وسبت المجال ومبقتش موجودة، والله أعلم كانوا عايزين ياخدوا مكاني ولا لا ولكن في الآخر كل شيء قسمة ونصيب ويمكن لو كنت كملت في الإعلانات والتمثيل مكنش هيبقى كويس ليا وأنا عندي سلام نفسي وعارفة إني نجحت في حياتي.
وأضافت نسرينا: ابني الكبير قالي سبتي شغلك ليه وكيانك وذاتك؟ قولتله أنا نجحت في تربيتكم ودا بالنسبالي نجاح إني وقفتك على رجلك واتخرجت وبتشتغل، وحسيت إني عملت الشيء اللي المفروض أعمله لأن والدهم مكنش فاضي وبيشتغل.
وتطرقت نسرينا للحديث عن زواجها، قائلة: لما اتجوزت كنا لسه بنبدأ حياتنا وبنفرش بيتنا، ووقفنا مع بعض من البداية ودا عطلني كتير لأني كنت مهتمة بالبيت وجوزي اشترط عليا ميجبش حد يساعدني غير لما أتعلم كل حاجة وأنضف وأطبخ.
