زيزي عادل عن اعتزالها: كنت عايزة أحس إني مستعدة أقابل ربنا
كشفت الفنانة المعتزلة زيزي عادل حقيقة ارتدائها الحجاب، مؤكدة أن ما حدث سوء تفاهم وارتدت الحجاب من أجل تصوير كليب ديني، بجانب الحديث عن أسباب اعتزالها.
وقالت زيزي عادل خلال لقائها مع الإعلامية ياسمين عز في برنامج كلام الناس: الناس كلها افتكرت إني محجبة أو اتحجبت ولكن دا كان سوء فهم لأني آخر حاجة قدمتها كان ألبوم ديني اسمه سيبها على الله ونزل في رمضان وكنت لابسة حجاب فيه وفنانات كتير عملوا كدا وبنلتزم بكلام الألبوم.
وواصلت زيزي عادل: والعجيب إني ظهرت في فيديو اعتزالي بشعري، يبقى ليه الناس تقول إني اتحجبت وقولت ادعوا لي ألبس الحجاب قريب ولكن مفيش فنان بيسلم من الشائعات وناس قالوا إني بعمل كدا عشان التريند ودي كانت حاجة غريبة جدا بالنسبالي وفيه ناس بتعمل حاجات عشان تطلع تريند لأنه موضة بس دا مش حقيقي.
كما تطرقت زيزي عادل للحديث عن أسباب اعتزالها الفن، قائلة: زمان كان كل تفكيري هلبس إيه في حفلتي وهعمل شعري إزاي واكتشفت هل لما أموت هاخد معايا الأغاني والكومنتات؟ واكتشفت إني هاخد معايا أعمالي وبدأت أفكر إني مش مستعدة أقابل ربنا بالحاجات دي، وكنت عايزة أحس إني مستعدة أقابل ربنا خصوصا بعد وفاة شباب صغيرين بكثرة الفترة دي والموضوع دا عملي صدمة لأن مفيش حد صغير على الموت ودا خوفني وأخدت قرار الاعتزال وأتمنى أي حد يسمعني يفكر في كلامي.
