وفاء مكي: أنا بصرف على يتامى وبتقي الله.. واللي هيتكلم عليا عنده حقد
كشفت الفنانة وفاء مكي عن رغبتها بالعودة لمجال التمثيل، مؤكدة أنها لم تجد عملًا مناسبًا لها وتعاني من الديون، كما ردت على مهاجميها بسبب قضيتها الشهيرة في تعذيب خادمتين.
وقالت وفاء مكي لـ القاهرة 24: أنا عضو في نقابة المهن التمثيلية ومش واحدة جاية من على السلم، وليا زمايلي فنانين مش لاقيين ياكلوا بسبب قلة الأعمال وأنا مش هقدر أرجع بعمل أقل مني ولازم أرجع بتاريخي لأني قدمت بطولات، ومع الأسف أنا عليا ديون حاليًا ومصاريف علاج لأمي المريضة اللي مش بتتحرك وبصرف على ابني اليتيم وكأني راجل البيت ومعاشي كله 3 آلاف جنيه.
وواصلت وفاء مكي: مش فاهمة الناس اللي بيتكلموا على قضيتي اللي بقالها 30 سنة ليه؟ إيه علاقة القضية بـ أكل العيش والشغل؟ الناس مبقتش بترحم ولا اللي عايشين ولا الميتين في الوسط الفني ولكن أنا مبقاش يفرق معايا لأني لو سمعت الناس بتقول عليا إيه هموت ومش هسلم منهم والسوشيال ميديا خلت الناس كأنهم نايمين معانا على السرير ومتدخلين في حياتنا.
وأضافت وفاء مكي: أنا سكتت سنين كتير وتعبت أنا مديونة هو أنا وجه جديد وحد هيكتشفني؟ ومش عايزة حد يرمي ليا دور أي كلام وكأني بطلب إعانة أنا عايزة اشتغل من عرق جبيني ومش عايزة حد يديني حاجة لله، وأنا ست بتقي الله وبيني بين ربنا عمار ومش بعمل حاجة حرام دا أنا بقول عايزة أشتغل.
