بسبب مشكلات فيسبوك.. أمين الفتوى: البنت لازم تفكر ألف مرة قبل أن تخاطب رجلا وعلشان إيه؟
رد الشيخ عويضة عثمان، أمين الفتوى بدار الإفتاء المصرية، على سؤال وجّه إليه نصه: أتمنى أجد عندكم حل يريح بالي من كثر التفكير.. من 5 سنين اتعرفت على زوجتي على فيسبوك، وعلاقتنا استمرت سنة بنتكلم واتكلمنا في كل حاجة تخطر على بالكم، وكثير جدا تجاوزنا الحدود واتجوزنا والآن معايا ولد، والمشكلة بدأت لما زملاء له كانوا بيتحدثوا عن البنات اللي بيتعرفوا عليها على النت، وإن دا إزاي بيحصل.. بعدها بدأت أقرف منها وأكرهها وكمان أهلها، وحاسس إنها في يوم هتخوني لأن أكيد أنا مش أعز من أبوها وأهلها، وبفكر بالفعل أطلقها فما رأيكم؟.
أمين الفتوى: البنت لازم تفكر ألف مرة قبل أن تخاطب رجل هي بتكلمه ليه وعشان ايه؟
وقال أمين الفتوى في تصريحات تليفزيونية: الرسول (ص) قال: إنما بعثت لأتمم صالح الأخلاق، ومكارم الأخلاق كلمة جميلة جدا، لكن الآن نجد أننا نخرج عن مكارم الأخلاق، وأيضًا لا نسعى للتخلق بأخلاق الحبيب صلى الله عليه وسلم.
وأضاف أمين الفتوى: الإنسان اللي بيتكلم مع واحدة على فيسبوك، ليه بيتجاوز؟، ليه بيتكلم أصلًا؟، الإنسان المفروض عرف الاسم يبقى خلاص يروح يخبط على البيت ويدخل من البيت من الباب، ويكون الطريق بتاعه شرعي.
وواصل أمين الفتوى: الراجل لا يتأثر كتأثر البنت.. البنت بتتأثر أكثر من الرجل، لأن البنت شيء جميل إذا اتكسر بيأثر على البيت كله، وربما يؤدي إلى انكسار الأسرة جميعا، لذلك البنت لازم تفكر ألف مرة قبل أن تخاطب رجلًا هي بتكلمه ليه وعلشان إيه؟، طيب حصل وهي أخطأت على كلامه هما تجاوزوا، وممكن يكون هو وعدها بالزواج، وبالتالي بعض البنات لما حد بيوعدها بالزواج فتفرض في حُبها فتفرط في أشياء كثيرة.
واستطرد: طيب اتجوزوا، وحصل اللي قال عليه مع زملائه، والشيطان بدأ يدخل له، فهو عليه ألا يسترسل مع وساوس الشيطان ومتحاولش أبدا الشيطان يسيطر أو يؤثر عليك ويقولك هتخونك وكذ وكذا، فمتسمعش الشيطان، هي وثقت فيك وسلمتك كل عواطفها ومشاعرها، وبقت زوجتك وأم ابنك، فانسى وسوسة الشيطان، وحاول تنسى الفترة السابقة.
وتابع عثمان: الأمر الثاني هو مين اللي أفسدها؟، مش أنت اللي كنت السبب؟، فبعد ما فتحت ليها باب الفتنة دي تحاسبها؟، طيب ما تحاسب نفسك، فلكل شاب بيخاطب بنت.. اتقي الله، وكل بنت اتقي الله في أسرتك ونفسك.
