دياب: الجمهور يتفاعل مع أدوار الشر.. وأتمنى موصلش لمرحلة أوافق على أي دور علشان الماديات
كشف الفنان دياب، تفاصيل شخصيته في حكاية في التاكسي، من مسلسل في كل أسبوع حكاية، والذي يقدم من خلال البطولة المطلقة للمرة الأولى، مشيرًا إلى أنه يريد تقديم عمل يليق بالجمهور.
وقال دياب في تصريحات تلفزيونية: المشروع عبارة عن 6 حواديت وكل حدوتة ليها أبطال مختلفة، وأنا بطل حدوتة منهم وهي حدوتة في التاكسي ومعايا زملاء كتير، وإخراج الأستاذ محمد عبد الرحمن حماقي، وكاتبها أستاذ مصطفى جمال هاشم.
وتابع: الحدوتة حاجة من مشاكلنا اليومية وبنحاول نعرض بشكل مبسط ومُسلي للناس، وده الهدف الأساسي للدراما هو الترفيه عن الناس وفي نفس الوقت بنطرح مشكلة وبنحاول نلاقي لها حل، وبنسيب الأفق للمشاهد لو كان في الموقف ده هيحله إزاي يليق مع وضعه.
وأضاف دياب، أن الجمهور يتفاعل أكثر مع أدوار الشر التي يقدمها، موضحًا: دايمًا الجمهور في الدراما أو السينما بيتعلق ويتفاعل مع الشخصية الشريرة بشكل كبير، ودو الشر ثري دراميًا وبيبقى ممتع للممثل وبيدي له مساحات عن الشخصية الطيبة، ولكن الشخصية الطيبة مكتوبة منضبطة زي دوري في مسلسل نسل الأغراب، بيعجب الناس زي الشر ما بيعجبهم.
كما علق دياب، على تقييمه لتجربته الفنية منذ بدايته حتى الآن، قائلًا: أنا تجربتي لغاية دلوقتي بعتبرها نبتة بحاول أرويها بمشاعري كفنان وتجاربي، ولكن أنا لسه بتحسس الطريق على الرغم من شعبيتي، وعندي أغاني ناجحة معلقة مع الناس زي غمازات والعو، بقالهم 12 سنة وتلاقي أطفال بيرددوها وده نجاح ممتد.
وتابع: ولو قعدت أفكر أنا نجحت في إيه مش هكمل، ومش شايف إني لسه عملت حاجة عظيمة عشان أقول إني عملت، لأ أنا لسة بتحسس الطريق وبحاول اتطور.
أما عن معايير اختياره للأدوار، فعلق قائلًا: الأدوار هي اللي بتختارني، وبختار أفضل المعروض عليا، يعني بشوف أقرب درجات النجاح اللي يرضي طموحي بنسبة 70 %، وفي نفس الوقت ممكن يكون اللي معروض عليا قليل فبختار الدور اللي أقدر أطلع منه حاجة.
واختتم دياب حديثه، قائلًا: مبحبش أشتغل حاجة وخلاص ويارب موصلش للمرحلة دي، ودي حصلتلي كمغني من غير ما يكون فيه تنازلات أخلاقية.
