رنا سماحة: كنا بنصلي في ستار أكاديمي رغم اختلاف أدياننا.. واللي شايف أنه ضد أخلاقنا ميشاركش فيه
ردت الفنانة رنا سماحة على تصريحات المطربة المعتزلة زيزي عادل، بشأن برنامج ستار أكاديمي، ووصفه بأنه لا يناسب عادات وتقاليد المجتمعات العربية.
وقالت رنا سماحة لـ القاهرة 24، إن الموسم الذي شاركت ليس نفس الموسم الذي شاركت فيه زيزي عادل، مضيفة: الإداراة والقواعد كانت بتختلف من موسم لموسم، ولكنهم كانوا بيأكدوا علينا عدم ارتداء ملابس مكشوفة على المسرح.
وأضافت رنا سماحة: مفيش حاجة اسمها كاميرات في الحمام سواء في الموسم اللي شاركت فيه أو أي موسم آخر، الأحواض فقط اللي عليها غسيل الإيد كان بها كاميرات، أما الحمامات بالداخل لا يوجد بها كاميرات.
وأكدت رنا سماحة: التجربة بالنسبة لأي حد مهمة، لأن برنامج ستار أكاديمي كبير ومهم ومفيش حد شارك فيه إلا والمكان أضاف له، مضيفة: اللي شايف إن البرنامج ضد عادتنا والمجتمع والمبادئ والأخلاق ما يدخلوش من الأول، إحنا جمهورنا من كل العالم سواء في الشرق الأوسط أو بره الشرق الأوسط وفي مجتمعات منغلقة أكتر من مننا كانوا متابعين للبرنامج.
واستكملت: أنت هتفرضي على الناس صورتك تظهر بأي شكل، هل هتكوني مثال جيد للبنت العربية ولا مثال سيء والناس تقول ما تمثلناش وأكيد في فروق من شخص للتاني.
وأردفت: كلنا رغم اختلافنا دياتنا كنا بنصلي داخل الأكاديمي.
أرفض المزايدة على الغير
وعن رأيها في اعتزال زيزي عادل الغناء قالت: الاعتزال حرية شخصية لأن من حق أي حد يكمل أو لا، لكني برفض المزايدة على الغير لو مش عاوزة أمثل لأسباب ما المفترض أن الأسباب دي تظل شخصية بيني وبين نفسي ما ينفعش علشان قررت ما اعملش حاجة أقول إنهم ناس وحشة، وأغلط فيهم أو أقلل من شائنهم أو أزايد على اللي بيعملوه.
واستكملت: لازم تفضل أسباب شخصية لأنه مش إجبار عليك تعرف الناس ولا تزايد على الناس اللي بتعمل الشغلانة.. مش علشان قررت تبطل تخسف بحق الناس اللي دعمتك وتنسى إن ليك زميل بيمتهن نفس المهنة اعتزل في هدوء دون مزايدة.
تصريحات المطربة زيزي عادل
وكانت الفنانة المعتزلة زيزي عادل، صرحت خلال استضافتها مؤخرًا في أحد البرامج ندمها عن مشاركتها في برنامج المواهب ستار أكاديمي في بداية مشوارها الفني، مؤكدة أن فكرة البرنامج لا تناسب معتقدات وتقاليد المجتمع.
وقالت زيزي عادل: لو رجع بيا الزمن أكيد مكنتش هروح برنامج ستار أكاديمي، لأني حاليًا بعد تغير فكري وتقربي من ربنا وكل اللي بيحصل لي ده يخليني أقول إن كان فيه حاجات كتير مكنش المفروض أعملها، مشيرة إلى أن فكرة برنامج ستار أكاديمي لا تناسب تقاليد المجتمع.
واستكملت موضحة أن ستار أكاديمي كبرنامج فكرته لا تناسب تقاليد مجتمعنا، قائلة: كان فيه كاميرات في كل مكان، حتى الحمامات كان فيها كاميرات عند المرايات، والموضوع ده كان بيضايق.
