سارة نخلة: أنا ضد التبرع للغارمات.. إنتي راضية إن مامتك تتسجن عشان تتجوزي؟
أكدت الفنانة سارة نخلة، أنها ضد التبرع للغارمات، مشيرة إلى أنها تحتقر أي فتاة تسمح لنفسها أن تغرم والدتها من أجل أن تتزوج وتسعد في حياتها.
وكتبت سارة نخلة عبر حسابها بموقع التواصل الاجتماعي فيس بوك: يعني إيه أروح أتجوز وأنا عارفة إن مامتي ماضية على نفسها شيكات أو سندات أو أي حاجة ممكن توديها في ستين داهية بس عشان أنا أتجوز واتبسط وأعيش حياتي واتفشخر قدام عريسي وأهله أن مامتي جهزتني وجابت لي التلاجة والغسالة وبالشيء الفلاني مع إني عارفة إنها مش هاتعرف تسدد ديونها.
وأضافت سارة نخلة: هو فين الإحساس والتربية والأخلاق اللي تخليني أسمح لنفسي إن مامتي يبقى اسمها من الغارمات والناس تتبرع لها بفلوس عشان تخرج من السجن بسببي.
وأردفت: أنا ضد التبرع للغارمات وبكره الكلمة دي وغير مقبولة تماما وبحتقر أي وحدة تعمل كدا في مامتها عشان تتجوز.. أنتي راضية إن مامتك تتسجن عشان أنتي تتجوزي، دا أنا لو مش هاتعب بالقرش وأموت نفسي ألف مرة عشان أحوش يبقى أنا ما استاهلش أصلا، ملعون أبو دي جوازة اللي ممكن تخلي مامتي عليها خطر لو 1 ٪، دا الناس بتتعب وتربي عشان بس يكبروا عيالهم يشيلوهم على دماغهم ويصرفوا عليهم مش عشان يتحبسوا بسببهم، مش قادرة أتخيل ولا أفهم الناس دي بتفكر إزاي بجد.
شيرين: أنا ضد التبرع للغارمات
وكانت الفنانة شيرين، قد صرحت مؤخرًا بأنها ضد التبرع للغارمات، خلال حضورها إحدى الندوات خلال فعاليات مهرجان الإسكندرية السينمائي لدول البحر المتوسط في دورته الـ 38، قائلة: اسمحوا لي أقول إني ضد التبرع للغارمات، وعارفه إني هتهاجم على الكلام ده.
