المطربة حنان تتحدث عن أصعب اللحظات في حياتها بعد وفاة زوجها
كشفت المطربة حنان عن أصعب لحظات حياتها بعد وفاة زوجها، وأكدت أنها عاشت في صدمة كبيرة بعده.
المطربة حنان تتحدث عن أصعب لحظات حياتها
قالت حنان خلال تصريحات تلقزيونية في برنامج واحد من الناس الذي يقدمه الإعلامي عمرو الليثي على شاشة قناة الحياة، إن أصعب لحظات حياتها كانت بعد وفاة زوجها، قائلة: بعد وفاة زوجي عشت فترة صعبة جدًا وكانت صدمة كبيرة خاصة إني كنت عايشة في ألمانيا.
وتابعت: وبعد وفاته تأثرت بشدة ومكنتش قادرة اتحمل العيشة في ألمانيا، وكنت عايزة أرجع لمصر بعد وفاته وأرجع لحياتي الطبيعية وللغناء.
وعن سبب عدم عودتها إلى مصر بعد وفاة زوجها، قالت: بنتي كانت بتدرس في كلية الطب هناك وقلت إن من واجبي أني أفضل جمبها لحد ما تخلص دراستها.
وأضافت: كنت بمر بأوقات صعبة جدًا وحزينة، وكنت بحس بملل كبير في المانيا وده بسبب عدم شغلي، وكل الستات هناك مابيشتغلوش ودايما كنت بقول لزوجي قبل وفاته إني بزهق، لأننا كنا بنستنى كل اجازة أسبوعية عشان نخرج ساعتين، ولو في ثلوج في الشوارع مكناش بنشوف ولا انسان في الشارع.
وتابعت حنان: كنت بروح أزور زوجى فى المستشفى اللي كان بيشتغل فيها، وكنت بقعد مع كبار السن وبيكونوا فرحانين بالحديث معايا لدرجة أن مدير المستشفى طلب مني أشتغل معاهم بمقابل مادي وأنا رفضت المقابل المادي وطلبت إني أشتغل بدون مقابل لأني مكنتش هعرف ألتزم بمواعيد ثابته عشان بداية شغلهم كانت الساعة 5 الفجر ومكنش فيه اجازات وأنا مابحبش حاجة تقيدني، ودي كانت الشغلانة الوحيدة وللأسف فشلت فيها.
