خدع عبد الحليم حافظ واعترف بحبه لـ نيللي في آخر أيامه.. سطور من حياة سمير صبري بذكرى ميلاده
تحل اليوم ذكرى ميلاد الفنان الراحل سمير صبري، والذي ولد في مثل هذا اليوم عام 1936، ولم يقتصر مشوار سمير صبري على التمثيل فقط، بل قدم عددًا من البرامج التلفزيونية والإذاعية، كما خاض تجربة الغناء.
وتميز الراحل سمير صبري، بإتقانه بعض اللغات الأجنبية بجانب لغته العربية، وملامحه الأوروبية، الأمر الذي جعل العديد من الفنانين يعتقدون بأنه ليس مصريًا، ومن أبرز هؤلاء الفنانين هو العندليب الأسمر عبد الحليم حافظ.
قصة خداع سمير صبري لـ عبد الحليم حافظ
وسبق وروى الراحل سمير صبري، تفاصيل تعرفه على الفنان عبد الحليم حافظ، وقال خلال حواره مع الإعلامية إسعاد يونس في برنامجها صاحبة السعادة: لما جيت القاهرة سكنت في العمارة اللي فيها النجوم، وطبعًا كان فيها عبد الحليم، ولما كنت برجع من المدرسة وأقعد في البلكونة بشوف العربية بتاعته داخلة حوش العمارة، أقوم أنزل جري عشان أشوفه، مكنش بيعبرني ولا بيتكلم معايا.
وتابع: كنت عايز ألفت نظره، ومرة كلمته بلهجة أجنبية، وقولتله أنا أمريكي راح بص لـ مجدي العمروسي، وقاله شايف الأمريكان عارفين إيه؟، واتعرف عليا وقولت له أن اسمي بيتر، وطلبت منه صورة معاه، ودخلت بيته وإداني صورة ليه موقعة منه، وبعدين خدت منه اسطوانات وصور ليه من اللقاءات العديدة وبقينا أصحاب.
وأضاف: مرة من المرات لقيت أبويا واقف مع عبد الحليم حافظ، وأبويا قالي تعالى يا سمير، وقاله يا حليم أنت مجنن الولد وغرفته كلها صور واسطوانات، وأنا تلاشيت إني أشوفه أو أقابله، وبعدين مرة بالصدفة قابلته فقالي بيتر؟، سنة وأنت عامل كده؟، قولتله أنا بحبك وأنت بتصور فيلم وأنا عايز أحضر معاك، وروحت معاه تصوير فيلم حكاية حب.
اعتراف سمير صبري بحبه لـ نيللي
وعاش الفنان سمير صبري، طوال حياته وهو تجمعه علاقة صداقة كبيرة بالفنانة نيللي، كما أنه أحبها ولم يفصح عن مشاعره إلا في آخر أيامه، حيث اعترف سمير صبري لـ نيللي بحبه عقب تسليمه لها جائزة الهرم الذهبي لـ إنجاز العمر بمهرجان القاهرة السينمائي.
وقال سمير صبري في تصريحات تلفزيونية: طول عمري بحب نيللي، ومُعذب، ومفيش حد خطفها مني.
