محمود سعد: بقيت أسعد الناس لأني مشيت من التلفزيون.. ولن أعود له
كشف الإعلامي محمود سعد، حقيقة عودته للتلفزيون مرة أخرى عبر شاشة قناة النهار، التي تم الإعلان عنها خلال الفترة الماضية.
وقال محمود سعد خلال حواره مع الكاتب تامر عبده أمين على تويتر: أنا من أسعد الناس إني مشيت من التلفزيون والعودة اللي هيعملوها قريب.. أنا مش هرجع.. هما هياخدوا المادة بتاعة يوتيوب ويعرضوها على قناة النهار.. هيسعدني إن الناس اللي مش بتشوف يوتيوب تتفرج عليا على قناة النهار.
وأضاف الإعلامي الكبير: مبسمعش نفسي خالص ومبقدرش اسمع صوتي خالص، ولما حصلت كورونا معرفناش ننزل نصور باب الخلق، ومكنش عندي حاجة غير إني أحكي ولقيت استحسان عند البعض.. وبحس إن الحكايات اللي بحكيها بتمس مشاعر ناس كتير بيمروا بنفس الظرف، بيبقى فيها نوع من أنواع الطبطبة على الناس وميحسوش إنهم لوحده وإن اللي بيعمل كده يبطل.. فيها معاني كتير جدًا.
وتحدث محمود سعد عن هبة شلبي قائلا: هبة بتشتغل معايا من سنة 2003 بقالها 20 سنة، فهي فاهمة الشغل كويس.. وهي اللي أصرت عليّا في موضوع اليوتيوب من حوالي 7 سنين ومسمتعش لكلامها غير من حوالي سنتين.. وفي يوم لقيت حوار ينفع ينزل على يوتيوب.. وبعدين هي اللي بقيت تعمل كل حاجة.
وتابع محمود سعد: لم أحلم بمكانتي الحالية.. الحياة مشيت بيا في سكك متعرجة كتير.. خدتني في أماكن مش مخطط لها.. خطط لإثبات وجودي في مهنة اخترتها.. أنا خريج آداب تاريخ واخترت المهنة دي.. والمهمة كانت في غاية الصعوبة.
