أنا مش بشرب مخدرات.. نص أقوال منة شلبي كامل في التحقيقات
كشفت تحقيقات النيابة العامة في قضية الفنانة منة شلبي، المتهمة بحيازة مخدرات، والمحالة للمحاكمة الجنائية، فيما أُسند إليها من إحرازها جوهر الحشيش المخدِّر بقصد التعاطي في غير الأحوال المصرَّح بها قانونًا، أنها كانت في مدينة نيويورك لحضور مهرجان فني.
تحقيقات قضية منة شلبي
س: ما قولك فيما هو منسوب إليكيِ من أنكِ متهمة بحيازة جواهر مخدرة بقصد التعاطي في غير الأحوال المصرح بها قانونيا؟
ج: محصلش.
س: ما الذي حدث إذًا.. وما هي ظروف ضبطك وإحضارك؟
ج: حصل إن أنا كنت مسافرة نيويورك عشان أحضر مهرجان إنتر ناشونال أمي أورد، ووصلت مطار القاهرة وعديت على الجمارك وأنا خارجة، وكان معايا 3 شنط والدنيا كانت زحمة وأنا حطيت الشنط اللي معايا على السير عشان يتشاف فيها إيه، ولقيت واحد من اللي واقفين في الجمرك بيقولي معاكي فيب سيجارة إلكترونية، فأنا قلتله إني أنا بدخن فيب، وكنت بفتح الشنطة عشان أوريله الفيب، فلاقيت واحد تاني جه وقالي إحنا هنفتح بقية الشنط نشوفها، وأنا وافقت وقلتله اتفضل وقعد يقلب في الشنط، وبعدين جه واحد تالت كان بيتفتش معاهم وأنا طلعت الفيب السجائر الإلكترونية، وواحد منهم قالي ممكن تقعدي شويه ووداني أوضة في الجمارك قعدت فيها شويه، والشنط كانت معاهم في الوقت ده، وبعد شوية لقيت ناس كتير وظباط مطلعين علبة ميكب لونها أخضر، بيقولولي أن دي فيها ماريجوانا فقلتله مفيش الكلام ده مش صح، وده ميكب عادي فلاقيته بيقولي معاكي كوكايين، قلتله أنا مش بشرب الحاجات دي أصلا، وبعدين قالولي طيب استني شوية، وبعدين أنا بقيت سامعه كلام كتير بره، وبعد ساعتين تلاتة لقيتهم بيقولولي اطلبي المحامي بتاعك، فبقولهم ايه الي حصل قالولي انتي معاكي ماريجوانا، وبعدين قالي انتي هتتعرضي على جهات التحقيق، وبعدين وأنا قاعدة، لقيت أخبار نازلة إني مقبوض عليا ومعايا مخدرات، وفضلت هناك لما جيت هنا، واتعرضت على جهات التحقيق.
أقوال منة شلبي بتحقيقات
س: متى وأين حدث ذلك؟
ج: الكلام ده حصل النهاردة الصبح حوالي الساعة الـ10:30 صباحا بمطار القاهرة الدولي.
س: ما سبب ومناسبة تواجدك بالمكان والزمان أنفي البيان؟
ج: أنا كنت راجعة من رحلة سفر من نيويورك من مهرجان كنت بحضره هناك.
س: من كان برفقتك آنذاك؟
ج: أنا كنت راجعة لوحدي.
س: ومن القائم بضبطك تحديدا؟
ج: أنا معرفش مين قبض عليا بس هو زي ما قلت بداية الموضوع كان في الجمارك وكان ناس واقفة في جمارك.
س: هل من ثمة حوار دار بينك وبين سالف الذكر؟
ج: نعم.
س: ما مضمون ذلك الحوار؟
ج: هما سألوني معاكي سجاير إلكترونية قلتلهم اه، ورجعوا سألوني معاكي كوكايين قلتلهم لا مش معايا الحاجات دي.
س: هل قام أحد بتفتيشك؟
ج: اه فيه واحدة بنت في المطار فتشتني بس معرفش اسمها.
س: ما الذي أسفر عنه ذلك التفتيش؟
ج: لا مكنش معايا حاجة.
س: ما قولك فيما ثبت بمحضر الجمرك رقم 255 لسنة 2022 الساعة الـ 12 مساء؟
ج: محصلش.
س: وهل توجد ثمة علاقة أو خلافات بينك وبين سالف الذكر؟
ج: لا.
