وفاء مكي تنهار في لايف مع القاهرة 24: حد يلحقني مش لاقية قوت يومي.. وهعمل اعتصام في النقابة
أثارت الفنانة وفاء مكي جدلا واسعا على مواقع التواصل الاجتماعي مؤخرًا، وذلك بعدما كشفت عن أزمتها المادية وعجزها عن سداد ديونها بسبب ابتعادها عن التمثيل لعدة أعوام.
وبدأ الأمر عندما قالت وفاء مكي في تصريح سابق لـ القاهرة 24 إن الفن مصدر رزقها الوحيد ولكنها لا يُعرض عليها أي أعمال فنية منذ سنوات، وتراكمت عليها الديون ولا تستطيع شراء الطعام أو علاج والدتها المريضة، ولكنها لن تقبل بأي أعمال فنية لا تناسب تاريخها الفني.
كما ظهرت وفاء مكي في بث مباشر مع القاهرة 24 وهي في حالة انهيار، وتحدثت عن تفاصيل أزمتها المالية، قائلة: أنا قررت أتكلم دلوقتي لأني تعبت وخلاص فاض بيا ومش قادرة أستحمل، بقالي 10 سنين عليا ديون بـ 500 ألف وأمي ست عيانة وفي حالة خطر وعندي التزامات ومديونة بقروض كمان من البنوك، وعايشة على معاش والد ابني 3 آلاف جنيه في الشهر ومش بيكفي حاجة لأن القرض بيتم سداده على 31 شهر لمدة سبع سنين.
وفاء مكي: عرضت شقتي للبيع وهضرب عن الطعام
وواصلت وفاء مكي: أنا كمان واخدة سلفة من نقابة المهن التمثيلية لما عرفوا ظروفي ولكن عليا وصلات أمانة ومش عارفة أسدد الديون دي، وعارضة شقتي للبيع وهبقى أعيش في شقة ايجار جديد، وهضرب عن الطعام لحد ما ألاقي حل وربنا يعين ابني اليتيم مش عارفة هيعمل إيه من بعدي، دا أنا من كام يوم ابني كان جعان ومش معايا فلوس نجيب أكل ومعيش قوت يومي لـ بكرا لدرجة بقيننا نلم الجنيهات عشان نجيب كيس عيش.
وردت وفاء مكي على مهاجميها والشامتين بها، قائلة: اللي حصل لي مالوش علاقة بقضيتي ومش ذنب اللي عملته.. وابني مالوش ولا حول ولا قوة عشان يتعاقب، ما يمكن يكون ده ابتلاء من ربنا علشان يختبر صبري، وقضيتي بقى لها 23 سنة وعملت بعدها بطولات ومسلسلات.
وأضافت وفاء مكي: فنانين كتير من غير شغل يا ترى كان عليهم قضية زيي؟ أنا بصرف على طفل يتيم وأمي مريضة ومش بتتحرك والناس اللي بتتكلم على قضية بقالها سنين دول مش لاقيين حاجة يقولوها دا فيه فنانين خرجوا من قضايا دعارة واشتغلوا عادي، هو فيه أكتر من الدعارة؟
