أغنية لمستك صنعت اسمي وخسارة اتكلم على المهرجانات.. أبرز تصريحات عمرو مصطفى في برنامج تفاعلكم
حل الفنان عمرو مصطفى، ضيفًا على برنامج تفاعلكم، الذي تقدمه الإعلامية سارة التندراوي، وتحدث خلال اللقاء عن مشواره الفني، ورأيه في مساعدة الملحانات الشابات في بداية مشوارهن.
ويستعرض لكم القاهرة 24 أبرز تصريحات عمرو مصطفى في برنامج تفاعلكم:
- أغنية لمستك صنعت اسمي.
- نجم مصر الأول محمد منير.
- مبندمش أبدًا على تصريحاتي.
- لازم الناس تدور وتعرف عمرو مصطفى ليه تاريخ.
- مبدأي إني مش هعمل حاجة لحد ومش هدي ألحان لحد، ولكن الموضوع متعلق بمزاجي.
- اللي بيقول على ألحاني زي بعض محتاج يزور دكتور نفسي.
- أقرب أعمالي لقلبي هي أغنية يا دايرة لأنها بتلخص سنة 2022.
- من ساعة ما نزلت أغنية إلا أنا مبقاش فيه خلافات ولا حد جه ناحيتي لأنهم سمعوا الموسيقى وعرفوا قد إيه هما في ورطة كبيرة، ومنزلوش أغاني من ساعتها.
- مفيش أغنية أو لحن تمنيت يكون ليا.
- لما تنزل أغنية على اليوتيوب وتعدي الـ 50 مليون مشاهدة شوفوا التعليقات والإعجابات، الإعجابات ممكن حد يشتريها لكن التعليقات لأ، ومن هنا بنعرف المضروب من الأصلي، وفي ناس سابت اليوتيوب علشان خافت.
- أنا مستعد أساعد أي ملحنة شابة عايزة تبدأ.
- مفيش حاجة اسمها الرجال أفضل من السيدات، السيدات متفوقات على الرجال في حاجات كتير.
- خسارة أتكلم على مطربين المهرجانات وهنشوف هيستمروا قد إيه.
- مراتي لازم يتعمل لها تمثال، لأن مفيش حد هيستحمل تقلباتي المزاجية غير سيدة عظيمة زيها.
- عمري ما حسيت بالفشل، لأن طول عمري عندي وسواس ومتردد قبل ما أنزل الحاجة، والحمد لله ربنا بيوفقني.
- بحترم نفسي ولما بلاقي في نجاحات كتير أنا مش هقدر أواكبها بقعد في البيت.
- نجاح الجميع هو نجاح ليا لأني هنافسهم ولازم الإعلام يبين ده.
- بحب أحضر حفلات محمد منير لأنه مختلف.
- أنا مش مغرور ولكن عندي ثقة بالنفس.
- لو حياتي أغنية هتكون يا دايرة.
- لم أندم على التعبير عن آرائي السياسية في 2011 لأن بلدي رجعت.
- لو رجع بيا الزمن وبقى عندي 20 سنة مكنتش هلحن لحد وهكمل في الغناء.
- أنا عايز المطربين يغنوا أغنية لمستك ويسمعوني صوتهم فيها.
- ألبومي الجديد مش بوجه لحد رسائل من خلاله، وأغنية يا دايرة بتعبر عن حالتي من سنتين.
- عندي 1780 أغنية قديمة ومنزلتش منهم غير أغنيتين.
- أنا مباخدش رأي حد ولكن بقرأ تعابير الوجه.
