بطل جمهورية وفنان موهوب.. شاب من ذوي الهمم: نفسي أمثل في مسلسلات رمضان
لم تمنعه إعاقته الحركية من تحقيق ما يحلم به، فبدأ في تحقيق شغفه بالتمثيل وبممارسة الرياضة، قصة كفاح الشاب عمرو عادل من ذوي الهمم في الفرقة الرابعة بكلية الآداب جامعة القاهرة، والذي لديه شغف كبير بالتمثيل والرياضة، القاهرة 24 تواصل مع عمرو ليسرد قصة كفاحه.
بطل جمهورية وفنان موهوب
وتحدث عمرو عادل عن التحديات التي وقفت في طريقه قائلا: سبب إعاقتي أنني حصلي تشنجات بصورة مفاجأة وأنا صغير، وبعدها والدتي ودتني للدكتور عشان تعرف سبب مرضي، والدكتور أخد مني عينة عشان يعرف سبب التشنجات ديه، وقعدت تحت الملاحظة، وبعد كده وصفلي دواء، عملي شلل في جميع أنحاء جسمي.
وأضاف عمرو عادل: قعدت سنين أهلي بيلفو بيا في المستشفيات، وبسبب البهدلة اللي كنت فيها جدتي قالت لأمي خليه يقعد يموت في البيت بدل بهدلة المستشفيات، وقعدت سنين في البيت مش بتحرك من على السرير، وكنت عايش على المحاليل، وعملت 12 عملية عشان أعرف أمشي على رجلي من تاني، وكنت باخد أدوية معينة وبطلتها لما كبرت.
وواصل حديثه قائلا: والدي توفي وأنا في 2 ثانوي في أول يوم مدارس، ومن صغري وأنا في الشارع، وبشتغل وبكافح، وفيه ناس كانت بتتريق عليا أنت مش هتنجح أنت مش هتعمل، ولغاية دلوقتي الناس ديه بتستغرب من اللي بعمله، بس أنا مش شايف أن ديه إعاقة، وأنا أحسن من ناس كتير وفيه غيري مبيقدرش يعمل حاجة.
عمرو عادل: هدفي أني أكون ممثل وأمثل في مسلسلات رمضان
واختتم عمرو عادل: من صغري وأنا بحب التمثيل، ودخلت الرياضة مش عشان بحبها، دخلتها لأني نفسي أني أعدل من نفسي، وإن جسمي ميفضلش ضعيف، ووالدي كان شغال في جرنال، فكان بينزلني مع ولاد المخرجين، اللى كانوا بيطلعوا في المجلات وهما صغيرين، وبالنسبة للرياضة حصلت على بطل جمهورية في الجري 200 متر، وحصلت على المركز الثالث بجامعة القاهرة، كما حصلت على شهادة تميز من مسرح الجامعة، عشان كنت عامل دور واحد كبير في السن، ورئيس الجامعة واللجنة كرمتني.
