رانيا يوسف: أنا أقل واحدة بلبس ألماظ.. ومجاليش شبكة بملايين في جوازاتي التلاتة
تحدثت الفنانة رانيا يوسف عن تجربة زواجها 3 مرات، مؤكدة أنها إنسانة بسيطة وتزوجت دون شبكة بمبالغ كبيرة، بجانب الحديث عن إمكانية زواجها مرة أخرى.
وقالت رانيا يوسف في تصريحات تلفزيونية: أنا بفضل ضل الحيطة عن ضل الراجل، وعمري ما هتجوز واحد سي السيد، وزي ما الراجل جواه طفل أنا كمان جوايا طفلة، الراجل الحلو شكلًا دا بيكون من برا بس ولكن في الحياة والمسئوليات الموضوع بيختلف، وبحس الرجالة بيخافوا مني وبيغيروا وبيتضايقوا لو بقيت مستقلة ماديا لأنهم عايزين أفضل معتمدة عليهم.
وواصلت رانيا يوسف: أنا لما بتجوز واحد مش محتاجة له ماديا بكون محتاجة له عاطفيا ويكون لي سند في الحياة، وكلامي دا عن تجربة 3 جوازات و2 مشروع جواز، والرجالة بيكونوا ملايكة أول 3 شهور وأول ما بتيجي سيرة الجواز وأننا هنكتب الورق بيتحول لـ وحش، وأنا ممكن أسامح الراجل مرة ولكن في التانية لأ وحسب الغلطة اللي عملها، وأنا إنسانة بسيطة وأقل واحدة بتلبس ماركات وألماظ ولكني بهتم ألبس بشكل لائق، ومجاليش شبكة بملايين في جوازاتي التلاتة، وأنا ممكن أكون ست بمليون راجل وأتحمل المسئولية والجواز سهل بس لازم أعرف هتجوز مين؟ وهل هيتقبل ظروف حياتي؟
آخر أعمال رانيا يوسف
وعلى جانب آخر، شاركت رانيا يوسف في العديد من الأعمال الفنية التي حققت نجاحا كبيرا، من بينها مسلسل المماليك ومسلسل منورة بأهلها ومسلسل شارع 9.
