محمد رمضان: لو رجع بيا الزمن مستحيل أقدم عبده موتة بنفس الشكل.. أنا بدخل بيوت الناس وبأثر في جيل بأكمله
علق الفنان محمد رمضان، على الانتقادات التي تعرض لها بسبب فيلمه الشهير عبده موتة، الذي تم عرضه عام 2012.
وتابع محمد رمضان خلال لقائه ببرنامج معكم الذي تقدمه الإعلامية منى الشاذلي: عملت عبده موتة كان عندي 24 سنة، لو رجع بيا الزمن مستحيل أعمله بنفس الشكل، لأن عقلي بقى أنضج وبقى عندي رؤية أشمل، وتفاصيل أكتر، لكن أنا ما كنتش متوقع أن هيشوفوه كم الناس دي وهيكسر السينما، والسينمات تفضل شغالة 24 ساعة على الفيلم، وبعد يومين من عرضه، السينمات اللي كانت رافضة تاخدوا يطلبوا ياخدوه علشان فيه إقبال كبير.
وأضاف محمد رمضان: أنا عارف أن جمهور كبير بيشوفني وبدخل بيوت ناس وبشكل جيل بأثر في جيل، ولو رجع بيا الزمن كنت هعمل نفس القصة بطريقة تانية ويبدو حسن النية في نهاية الفيلم لأن عبده موتة أتعدم صغير وما طلعتوش منتصر.
محمد رمضان يتحدث عن عبده موتة
واستكمل محمد رمضان حديثه: أنا رؤيتي اتغيرت وما كنتش أعرف أنا هبقى فين عند الجمهور، وفي 2012، قبل ما أقدم عبده موتة، كنت ماضي بطولة مطلقة لفيلم اسمه الألماني، وفيلم ساعة ونص عامل فيه 4 أو 5 مشاهد ووافقت وفيلم حصل خير مع كريم محمود عبد العزيز وسعد الصغير، علشان أقول للجمهور أنتم ما تعرفونيش أنا ممثل طالع من وسطكم بقدم لكم نفسي وأنا كبطل وأنا بقدم بطولة جماعية وأنا بقدم 5 مشاهد فقط، ولقيت العرض اللي جالي بعد التلات أفلام دول بطولة فيلم عبده موتة يبقى الجمهور والسوق عاوز يختارك.
واختتم محمد رمضان حديثه: أصلا النهارده لو المنتج نفسه هيعيد الفيلم هيعمله بمواصفات أخرى وهيبقى ميزانيته أكبر وأنا هفكر أن العقاب يكون من بدري، لأن الناس عندها حق والدليل أني حاولت نعمل أدوار مختلفة زي شد أجزاء والكنز وابن حلال.
