محمد حماقي يكشف تفاصيل انفصاله عن زوجته وعودته لها: مكنتش عارف اتخطاها ولا أشوف غيرها
تحدث الفنان محمد حماقي، عن كواليس انفصاله عن زوجته وعودتهما مرة أخرى، مُشيرًا إلى أن الطلاق من الممكن أن يكون مفيدا للطرفين حتى يشعران بقيمة بعضهما، كما أكد أنه يمكن أن يقدم أي لون غنائي يريده وخاصة الشعبي.
وقال محمد حماقي عن زوجته، خلال حواره مع الفنان إسعاد يونس، في برنامجها صاحبة السعادة، المذاع عبر شاشة قناة DMC: إحنا انفصلنا سنتين ومفيش حد خد باله ولا عرف، وكنت حريص إني مقولش عشان ميحصلش تجاوز، اللي حصل كان مرحلة عدم تفاهم وتتخين دماغ بدون داعي وافتكرنا أن الحل الأمثل إن كل واحد ارتاح من التاني.
وتابع: لكن اكتشفنا إن مش ده الحل أنا قعدت سنتين مش عايز أقابل ولا أشوف حد غيرها ومش عارف أتخطاها، وأوقات كتير بالليل كنت بفكر إنها ممكن تتجوز وأزعل وأضايق طب أنا ليه عامل كده في نفسي، والطلاق أوقات كتير بيكون مفيد ولكن عرفنا قيمة بعض ورجعنا وأنا بحبها من كل النواحي بحبها من عقلي ومقتنع جدًا وبحبها بمشاعري والحمد لله إننا رجعنا.
كما كشف محمد حماقي، عن تغيير محل إقامته من التجمع الخامس لـ أكتوبر، قائلًا: مراتي من سكان الزمالك، ونقلت من مدينة نصر لـ أكتوبر علشان معزلهاش عن أهلها وإخواتها، خاصة إني بسافر كتير ومش طول الوقت موجود، حسيت إن ده ظلم لو عزلتها.
محمد حماقي
وأكد الفنان محمد حماقي خلال حواره، أن الجمهور يصنف الأغاني الشعبية بشكل خاطئ، موضحًا: أنا ممكن أغني شعبي ولكن شعبي بتاعي أنا في الغلاف بتاعي مش بتاع حد، وفي ناس دايمًا بتصنف الشعبي غلط، الشعبي هو الشعب يعني أكبر شريحة، يعني الأغنية اللي بيحبها وبيفهمها أكبر شريحة هي أغنية شعبي، ودي ليها طريقة وهتختلف عند مغني.
