فيفي عبده لـ ياسمين عز: لازم الراجل يكون سي السيد.. هو لما يبقى شرابة خرج هيملى عينيا؟
كشفت الفنانة فيفي عبده، رأيها في آراء ياسمين عز ونصائحها للسيدات، وقالت فيفي عبده خلال استضافتها في برنامج كلام الناس تقديم الإعلامية ياسمين عز: أنتي بتحبي الرجالة وكل الستات ضد الموضوع ده، إيه الحكاية يا ياسمين؟
وردت ياسمين عز: شفنا في العصر اللي إحنا فيه الست بتفضح الراجل على السوشيال ميديا، علشان كده بدأنا ننتبه إن لازم ناخد بالنا من علاقة الرجل والمرأة، وكل اللي قلته الست تاخد بالها من الراجل وتعامله سي السيد ولما يتعصب تسيبه يهدى وتقول له حاضر، هل كده يسيء لها في شيء، لقيتهم بيقولوا إني بكده بخلي الست شخصيتها ضعيفة.
طول عمري بقول إن الراجل سي السيد
وبدورها ردت فيفي عبده قائلة: أنا شخصيتي قوية لكن أنا طول عمري بقول الراجل سي السيد هو لما يبقى شرابة خرج هيملى عينيا، لازم يكون سي السيد في البيت وبره البيت.. أمال هحترمه إزاي، علشان يملى دماغي، ويكون راجل متزن، ولما يعمل حاجة أنا أشده جوه وما يدخلش تالت في النص، أنا ماخلتش حد يدخل في حياتي أنا وهو وبس، مش بقى الميديا كلها معاكي، شوفي نسبة الطلاق بقت كام دلوقتي.
وأضافت فيفي عبده: الجديد بقى إن الرجالة بيقوا الست، ويقولوا لها تتعامل إزاي بقوا عاوزين الستات سايبين رجالتهم وبيصطادوا في الميه العكرة، ولما جوزها يسيبها من هنا التاني يخلع، لو زوجك اتجرح منك مش هيقدر يرجع لك، وأنتم راعوا الناس اللي عندها ولاد.
وتابعت: أنا شفت قضية ست قتلت جوزها وولادها علشان عشيقها، وفي الآخر اداها بومبة، الميديا بوظت الناس، الميديا المفرض نستغلها في الحاجات الكويسة مفيش حاجة إلا فيها فضيحة.
