عمر كمال: وقت ما كانت أم كلثوم بتغني عدوية كان بيغني السح الدح إمبو
أكد مطرب المهرجانات الشعبية عمر كمال، عدم وجود أي خلافات مع مطربي الراب، متخذًا كوكب الشرق أم كلثوم، والفنان أحمد عدوية كمثال.
وقال عمر كمال خلال تصريحات تلفزيونية، إنه لا يختلف مع مطربي الراب، مشيرًا إلى أن الراب نوع من أنواع الفن موجود مثله مثل أي لون غناء آخر، معلقًا: معنديش مشكلة مع بتوع الراب وهو لون موجود زي أي لون، يعني أم كلثوم كانت بتغني وفي نفس الوقت عدوية كان بيغني السح الدح إمبو.
وتابع عمر كمال: الراب سيطر آخر سنة بس مش عايزين نقارن ناس كانت بتغني بناس تانية اتوقفت من الغناء أكتر من 9 شهور، أنا بعد حفلتي في ستاد القاهرة حضرها حوالي 120 ألف بعدها معرفتش أغني في مصر، بعكس مغنيين الراب كانوا بيغنوا وبيعملوا حفلات وكان عندهم مساحة، وبرضو في مغنيين مهرجانات عملت شغل كويس.
عمر كمال يكشف سبب بيعه سيارته
كشف المطرب عمر كمال، خلال اللقاء سبب بيعه لـ سيارته البنتلي قائلًا: خفت آخد عين، وبعتها عشان حسيت إن بفلوسها أقدر أساعد غيري وأساعد نفسي بحاجات تانية، وده اللي حصل بالفعل.
وأردف: أنا ربنا مراضيني فوق الرضا رضا، وعمري ما قارنت أجري بأجر حد ومنفسيش أوصل لأجر حد، أنا كنت فين من سنتين وبقيت دلوقتي فين، ولما أغني 30 أو 40 سنة زي النجم عمرو دياب أبقى أوصل لأجره.
عمر كمال: عمري ما شربت خمور
وعن شربه للخمور علق عمر كمال، قائلًا: أنا عمري ما شربت أي حاجة وصحابي في الوسط عارفين ده، ومستحيل حد يلاقيلي أي صورة أو أي فيديو وأنا فيه مع واحدة وأنا سكران، الناس هي اللي بتحب تطلع على الوسط بتاعنا إن الكل بيشرب، بس الوسط كله محترم.
وأضاف: أنا ليا أعداء كتير في الوسط، بدون ذكر أسماء، وحمو بيكا وحسن شاكوش حبايبي وببارك ليهم دائما على نجاح حفلاتهم.
كما رفض عمر كمال أن يتحدث عن حياته العاطفية، وعن شائعة ارتباطه، معلقًا: معلش مش حابب أتكلم عن حياتي الشخصية وأعتقد مش هتفيد الناس.
