أحمد فرحات عن مشاركته في العيلة دي: وافقت بسبب إنعام سالوسة.. وأكيد واحد فوق الـ70 مش هيحب واحدة 20 سنة
علق الفنان أحمد فرحات، على مشاركته كضيف شرف في مسلسل العيلة دي، معربًا عن سعادته الكبيرة باستقبال الجمهور له، مؤكدًا أن الفنانة إنعام سالوسة هي السبب الرئيسي في قبوله للمشاركة بالعمل.
وقال أحمد فرحات، في تصريحاته الخاصة لـ القاهرة 24: اللي خلتني أوافق على الدور هي الفنانة إنعام سالوسة، ولو كنت روحت لقيت شابة صغيرة مكنتش هوافق على الدور؛ لأن مش معقول واحد عنده 70 سنة يحب واحدة عندها 20 سنة.. هيبقى فيه حاجة مش مظبوطة، وأول ما لقيت إنعام سالوسة وافقت على طول وهي فنانة جميلة.
وأوضح أحمد فرحات، أنه يتمنى العودة من جديد للتمثيل، قائلًا: جمهوري حبيبي مشتاق لي، ومابيصدق يشوف حاجة ليا، وأنا كمان مشتاق ليهم، ونفسي أمثل وعندي القدرة لده، لكن من غير ما أخبط على باب حد، والمسلسل كان بيتعرض بقاله شهر وأسبوع، وماسمعناش عنه ولكن الحمد لله الجمهور بيحبني.
وأضاف: مبحاولش أخبط على باب حد، لأن أنا فوق الـ70 سنة، ولو حد كلمني بطريقة وحشة ممكن تأثر في نفسيتي، ومرة جالي جلطة بسبب الزعل.
مسلسل العيلة دي
وشارك في بطولة مسلسل العيلة دي، مجموعة من النجوم منهم: وفاء عامر، إسماعيل فرغلي، محمد ثروت، إسلام إبراهيم، إنعام سالوسة، وهو من تأليف يسري الفخراني، وإخراج أحمد خالد أمين.
ودارت أحداث مسلسل العيلة دي، في إطار اجتماعي كوميدي، حول عائلة مصرية تنتمي للطبقة المتوسطة، ويتم من خلال تلك الأسرة طرح عدة مشاكل وقضايا إنسانية تحدث بالفعل في مجتمعنا الحالي.
