طارق الشناوي: الشعراوي تمتع بـ كاريزما طاغية وصدّر أفكار حسن البنا مؤسس جماعة الإخوان
تحدث الناقد الفني طارق الشناوي عن الأفكار التي صدرّها الشيخ محمد الشعراوي، إذ أكد أن الشيخ الشعراوي صدّر الأفكار التي صدّرها حسن البنا مؤسس جماعة الإخوان.
طارق الشناوي يتحدث عن الشيخ الشعراوي
وأكد الناقد الفني طارق الشناوي في تصريحات لـ القاهرة 24، أن الشيخ الشعراوي كان يتمتع بـ كاريزما طاغية استطاع من خلالها السيطرة على الشارع، معلقًا: الشعراوي أفكاره كلها ضد العصر، وكان عنده كاريزما طاغية.
وأضاف: الشعراوي عنده قاعدة شعبية عميقة وعنده كاريزما جعلته يسيطر على الجمهور، لكن دا لا يعني إنه على صواب، بس هو عنده حضور لحد دلوقتي في الشارع، يعني صورته دلوقتي على الميكروباصات وعلى التكاتك أكتر ما بنشوف صور عبد الحليم وأم كلثوم، وحتى لاعيبة الكورة لم يحظوا باللي حظى بيه الشيخ الشعراوي.
وتابع طارق الشناوي: الشعراوي قال حلاله حلال وحرامه حرام ويبقى برضو عملنا ترمومتر تسجيلي وأول واحد صدر هذا الترمومتر هو حسن البنا مؤسس الجماعة.
وأردف طارق الشناوي: الشعراوي كان رافض الفن رفض قاطع، وتعبير حلاله حلال وحرامه حرام الشيخ حسن البنا أول واحد قالها ولو فكرنا فيها فهي في الآخر بتجعل المرجعية دينية لأنك اتكلمت عن الحلال والحرام مش الجميل والقبيح، وفي الفن معيارنا هو الجميل والقبيح إنما في الدين المعيار حلال وحرام.
وفي سياق متصل، قال طارق الشناوي: الشيخ الشعراوي كان بيقول إن تارك الصلاة يقتل طب إزاي؟ يعني مش منطقية خالص، ففي حاجات إن مثلا الرجل يضرب المرأة ويشتمها وبيقول إنه يعني عشان شاف عورتها وفيها إيه لو شتمها، طيب ماهي برضو لو شتمته وضربته يبقى عشان شافت عورته، دا توجهه ذكوري.
وعن تقديم سيرة الشيخ الشعراوي في عمل مسرحي، علق الشناوي: يا ريت كل قرار قادم يبقى عمقه له رؤية سياسية، يعني نسأل هل إحنا في الوقت ده نحتاج إلى الشعراوي ولا قصة الإمام محمد عبده المستنير، وأكيد كلنا عايزين الرسالة اللي قالها الشيخ محمد عبده وهي دي اللي في القرن التاسع عشر توصل، هي دي اللي نفسنا إننا نتابعها، وهي المساواة بين الرجل والمرأة ورحابة فكر الدين الإسلامي.
