هاجر أحمد: بعمل لبنتي عيد ميلاد كل شهر.. وكان نفسي اسمّيها إيزابيلا وجوزي رفض
حلت الفنانة هاجر أحمد ضيفة في برنامج سهرانين، تقديم الفنان أمير كرارة عبر قناة on، وتحدثت عن ابنتها، إلى جانب بداية مشوارها الفني وكيفية دخولها مجال التمثيل.
وقالت هاجر أحمد عن ابنتها: بعمل لها كل شهر عيد ميلاد، لأني كل يوم معاها بعتبره إنجاز، والحمد لله إني صامدة لحد دلوقتي.
وأشارت هاجر أحمد إلى أنها كانت تتمنى أن تسمي ابنتها إيزابيلا، لتعلقها بالاسم نظرًا لتقديمها دورا يحمل نفس الاسم في مسرحية، قائلة: كانت شخصية حلوة جدًا فاتعلقت بيها، وجوزي رفض، وقال لي شكلي هيكون إيه قدام الناس، وهو اللي سماها غالية في نفس اليوم اللي سجل اسمها.
وتحدثت هاجر أحمد عن طفولتها، قائلة: كنت شقية وفي البيت هادية، وإحنا 9 أخوات أنا أصغرهم والفرق بيني وبين أخويا الكبير 18 سنة.
هاجر أحمد: أهلي كانوا رافضين دخولي مجال التمثيل
وأشارت إلى أن عائلتها كانت رافضة لدخولها مجال التمثيل، موضحة: زي أي أسرة قلقانين من فكرة التصوير وأوقاته، خاصة أني كنت أصغر واحدة في أخواتي ومهما كبرت شايفني طفلة صغيرة، وكانوا بينزلوا معايا أخويا وأخوتي.
وأضافت هاجر أحمد، أنها درست في كلية الآداب قسم علم النفس، مستكملة: أنا طول الوقت عاوزة أمثل حتى لو بقيت دكتورة، وقدمت في معهد فنون مسرحية قبل دخولي الجامعة واترفضت، وبعد سنة من دخولي الجامعة قدمت تاني في معهد سينما ومعهد فنون مسرحية.
وتابعت: كنت بحب التمثيل من وأنا صغيرة، وقبل المدرسة كان بابا بيصلي في المسجد وياخدني معاه وبيعملوا أنشطة في المسجد، وكنت بشارك فيها، وكنت مرتبطة جدًا بفيلم صغيرة على الحب، لأن سعاد حسني كانت مقدمة أكتر من شخصية وكنت بشوف نفسي فيهم.
كما تحدثت هاجر أحمد عن أول مرة تقف فيها أمام الكاميرا: كنت بعمل دور ميرفت أمين، وهي صغيرة وبتقابل الشحرورة صباح، وقلت جملة واحدة فضلت أحفظ فيها طول النهار والليل ومع ذلك اتلخبطت وماكنتش فاهمة حاجة، وخدت مبلغ 300 جنيه، وكان بالنسبة لي مبلغ كبير جدًا.
