ياسمين عز: لما الراجل بيسبق مراته في المشي ده بسبب روح الفرعون اللي جواه
علقت الإعلامية ياسمين عز، على أزمة يُعاني منها بعض متابعاتها أثناء الخروج والتسوق مع أزواجهن، حيث بررت أفعال الرجال مسندة هذه التصرفات إلى الروح الفرعونية بداخلهم على حد قولها.
وقالت ياسمين عز، خلال مقدمة برنامجها كلام الناس، المذاع عبر شاشة قناة MBC مصر: في حاجة بعتولي كتير عليها، هي أن الراجل بيكون ماشي مع مراته في المول مش بيبقى ماشي جنبها بيكون ماشي قدامها بـ 2 متر، ده بيضايقك في إيه؟ ده بيدل على عظمة الرجل، مش عارفة هتفضلي لغاية إمتى ظالمة الراجل، ده بيعمل كده عشان روح الفرعون اللي جواه، ده عايز يعوّدك على الموكب الفرعوني، مش يمكن الكام متر اللي سبقك فيهم دول بيعملك مفاجأة؟ مستنيكي قدام محل مجوهرات عشان يجبلك هدية، ارحمي الراجل شوية.
الست بتاخد بالها من التفاصيل
وأردفت ياسمين عز قائلة: الراجل ساب النوم ونزل عشان يبسطك، وسبقك بكام متر مش لازم تبوظي اليوم، وتم إثبات علميًا إن الست بتاخد بالها من تفاصيل دقيقة، الراجل خارج مع مراته يتبسطوا عادي خلي صدرك رحب.
وأضافت: لو خارجين معاكم ولادكم تخيلي لما تكوني أنثى ناضجة بتخلي بالك من التفاصيل مابالك لما يكون معاكي ولادك وكل واحد ليه طلبات وهو يا عيني ممكن يكون عنده دوالي أو رجليه وجعته من الوقفة عشان يلبي طلباتك إنتي والولاد، مبيرتاحش يوم الاجازة إنتي مبيجيش من وراكي راحة أبدًا تعالى يوم إجازتك أستنذفك، خلاص مبقاش في رحمة في قلبك وهو ولا بيرد ولا بيصد.
واختتمت ياسمين عز حديثها حول هذا الأمر، قائلة: لما بيسبقك قدامك بـ 50 متر بيكون بيستغفر ربنا، بيأمنلك الطريق أنا عايزة يكون ستايلك فرعوني ده مصري أصيل، روحي شوفي المتحف والحفريات.
ياسمين عز
كما وجهت ياسمين عز، نصيحة للسيدات اللاتي يطلبن أموالًا من أزواجهن لإجراء تغييرات على شكلهن، قائلة: متجيش أول ما جوزك يقبض المرتب تقولي له إديني فلوس أعمل شعري بروتين، بروتين إيه يا مدام؟ ما إنتي طول عمرك عايشة بتسريحة الأناناسة، لازم دلوقتي تكبشي وتعملي؟ متعمليش البروتين لو هيضر فلوس جوزك.
واستكملت: اعملي له بطة بالبرتقال، ده اللي هيفيدك وهيفيد جوزك، البط هيفيدك وهيطلع على شعرك، وإوعي تفكري إنك أحلى منه هو حلو بردو، بلاش نقلد أي حد ومحدش يجيب سيرة البروتين تاني، ده جدي الكبير الله يرحمه لما جاب تليفزيون خشب الجيران اتصوروا مع التليفزيون، بروتين إيه اللي بتتكلمي عنه.
