أرملة الإبراشي لـ القاهرة 24: نقلت بنتي من مدرستها بسبب تنمر الطلاب بعد إصابة والدها بكورونا
كشفت سحر أحمد، أرملة الإعلامي الراحل وائل الإبراشي، تفاصيل جديدة في الذكرى الأولى لوفاته.
وقالت أرملة الإبراشي في تصريحات خاصة لـ القاهرة 24: ما زلنا نعاني حتى بعد مرور عام من وفاته بفقدانه، وبنتي بنعالج فيها لحد دلوقي بسب وفاة أبوها والصدمة اللي تعرضت ليها، مضيفة: أنا ماخدتش بنتي معايا المقابر عشان ما تشوفش المنظر.
وتابعت: بنتي لسة صغيرة، والصدمة اللي تعرضت ليها كبيرة أوي، تعالوا اسمعوا صراخ بنتي كل يوم في أوضتها عشان أبوها، كان عندها امتحانات وأول يوم امتحان ليها كان يوم وفاة أبوها، والمدرسة أجلت الامتحانات وامتحنت بعد كده، معلقة: نقلت بنتي من مدرستها بسبب تنمر الطلاب عليها بعد إصابة والدها بكورونا.
وواصلت: بنتي كانت بتقولي احنا بنتشتم ليه كل شوية من أهل زوجي، وكل شوية يقولوا هربت بالفلوس بتاعته، ليه هو أنا المستريح؟! كل ده عشان كنت برة البلد 10 أيام وبعدها وائل تعب.
وتابعت: أنا عملت إعلان الوراثة بسرعة البرق، اتعمل خلال أيام بسبب الزن اليومي من عائلته، ورفضت حينها أتكلم في الموضوع ده عشان المرحوم.
وتساءلت: إزاي بتطلبوا مني مروحش زيارة لوائل في المدافن عشان حرام، وفي نفس الوقت عملتوا عزاء لوالدة الإبراشي في مسجد عمر مكرم، وكان فيه تصوير وتشهير.
وتابعت: ميصحش إني أقف جنب جوزي طول سنة المرض قبل وفاته، وعائلته محدش فيهم كان بييجي ولا نعرف عنهم حاجة، وظهروا فقط عشان ياخدوا الميراث والفلوس، مضيفه: أنا ساكتة ومش عاوزة أتكلم.
