بعد تحرش أهلها بها في الطفولة.. وفاء سالم: بحس إن البنت مباحة.. وهدفي الناس تاخد عظة مني
تحدثت الفنانة وفاء سالم عن تفاصيل تعرضها للتحرش في طفولتها، مشيرةً إلى أنها كانت تهدف من سرد تلك القصة، إلى توعية أولياء الأمور بضرورة الانتباه ووجود حوار بين الأبناء وأولياء الأمور.
وقالت وفاء سالم لـ القاهرة 24: كنت طفلة خجولة وبخاف فعشان كده مقولتش لوالدي ووالدتي إن بعض أهلي كانوا بيتحرشوا بيا، الفيديوهات اللي أنا عملاها والقناة مش مجرد فضفضة مش هدفي الفضفضة، أنا زي ما قولت عندي توجه إنه الإنسان يعرف يقول اللي جواه واللي حصل معاه يبقى عبرة وعظة للآخرين، بحس ديمًا إن البنت مباحة، وبنسمع عن حوادث تحرش كتير حتى المنتقبة.
وأضافت: اللي أنا بقوله إنه لازم العيلة تنتبه، ده أنا عندي قطة صغيرة كل ما بفتكر اللي حصلي وبحضنها برقة بقى ودي قطة، وهدفي إني أقول للناس انتبهوا، وكما لما بكون فنانة بيبقى فيه مصداقية عند الناس، ولو ابنك استخبى وهو في البيت متقوليش إنه بطل يزن لا انتبهي وشوفي مينفعش أبدًا أسيب ابني لأفكار معرفهاش، ولا بد من الحوار المطلوب ونحتضن أولادنا صح، بلاش نشخصن الأمور.
وأردفت وفاء سالم: قدمت تجربتي عشان عندي ناس بتحب تسمعني هو ده المقصود وده كان جارحني والجروح بتبقى جوانا واحنا أطفال ده الأساس ولازم الأهالي ينتبهوا، أنا مش بخلف وأرمي.
وأردفت وفاء سالم: حاليًا بحاول أبحث عن موضوعات تهم المتلقي توصل الرسالة الواجبة عليّا، وطالما عندي ناس بتحبني الحمد لله وإلا مكنش فيه التريندات دي حصلت بسبب الاعتزال وتغيير الذوق العام.
أما عن عملية التجميل التي شوهت ملامحها، قالت: روحت لدكتور تاني عشان يشيل الأخطاء اللي اتورطت فيها من خلال سماسرة تجار التجميل، واسترديت ملامحي، حتى لما ظهرت على فيديوهات على يوتيوب، مكنتش حاطه مكياج كتير.
وعن تفرغها للعبادة، أضافت وفاء سالم: أنا مبحبش أقعد أتكلم أنا مش داعية أنا زي ما ربنا قالنا من يتقي الله يجعل له مخرجًا ويرزقه من حيث لا يحتسب والرزق مش فلوس وإن رربنا يسترها علينا ويهدينا، طول عمري عندي ده مبتكلمش في القضية دي عشان هي أكبر مني وأكبر من إني أشرحها.
