مي الغيطي: بحس إن دمي ثقيل.. ومعنديش موهبة كتابة أغاني عربي
تحدثت الفنانة مي الغيطي، عن كواليس مشاركتها في فيلمي مهمة في سهل حشيش، وفيلم كاملة، كما علقت على ردود أفعال الجمهور على أول تجربة غنائية لها، والتي كانت باللغة الإنجيليزي.
وقالت مي الغيطي، خلال حوارها مع برنامج The Insider بالعربي، عن مشاركتها الفنانة ليلى علوي، في فيلم مهمة في سهل حشيش: شرف كبير جدًا إني أشتغل معاها، ومن الحاجات الملهمة منها إن مهما كنت تعبانة وعليا ضغط.. لازم الإنسان يفضل روحه جملية.
وكشفت مي الغيطي، تفاصيل شخصيتها بفيلم مهمة في سهل حشيش، موضحة: أول مرة أقدم كوميدي، وأنا بحس إن دمي ثقيل جدًا، ولكني مُحاطة بناس من أكبر الممثلين الكوميدي في الوسط، ودي حاجة بتكون خفيفة وتحدي في نفس الوقت، والشخصية في الفيلم بتعيش قصة حب مع حمدي الميرغني، وبيحصل بينهم مواقف كثير كوميدية.
وعن أصعب مشاهدها في فيلم كاملة، بطولة الفنانة إنجي المقدم، أوضحت الفنانة: مكنش صعب، ولكن فوجئت في مشهد لما كانت الشخصية بتحكي لـ كاملة اللي هي الطبيبة النفسية بتاعتها عن اليوم اللي اتعرضت فيه للختان، بالنسبة لي كل المشاهد كانت أسهل من المشهد ده، بسبب وجود تروما في الشخصية دي.
مي الغيطي
وحول تجربتها الغنائية الأولى، وإطلاق ألبومها الأول باللغة الإنجليزية، علقت الغيطي: كنت عارفة من قبل ما أنزل الألبوم، أن هيبقى في ناس معينة أوي اللي هيعجبهم لأن ده مش الذوق العام، ولكن مبسوطة إن الناس اللي عجبهم الألبوم تفاعلوا معاه، ومع إن الألبوم نزل في مايو، ولكن بيقولولي على الأغاني اللي عجبتهم، وفي ناس مش عاجبها إني بغني بالإنجيليزي مش عربي.
وفيما يتعلق بغنائها باللغة العربية؛ قالت مي الغيطي: أنا معنديش مشكلة أغني عربي، ولكن المشكلة إني بكتب أغانيا بنفسي، وأنا معنديش موهبة إني أكتب بالعربي.. بالتالي هضطر أتعامل مع كاتب أغاني غيري، ودي تجربة جديدة ليا وأنا مرحبة بيها.
