مش شايفاني حلوة.. إنجي وجدان: ماما عقدتني في حياتي بسبب التخن وهزت ثفتي في نفسي
تحدثت الفنانة إنجي وجدان، عن بداية أزمتها مع السمنة، وكيف تخطت الموضوع وأصبح لديها ثقة بنفسها، مشيرة إلى أن والدتها كانت عاملًا كبيرًا أدى إلى فقدان ثقتها بنفسها.
وقالت إنجي وجدان خلال لقائها في برنامج الستات: أنا طول الوقت خاصة اليومين دول فيه حد مستقصدني وحاططني في دماغه شاكة هو مين ولكني مش متأكدة، من زملائنا بالوسط الفني.
وأضافت: إحنا طبيعي بنمر بظروف صعبة في حياتنا، غصب عننا إحنا بني آدمين، علشان كده لازم ثقتي تفضل موجودة وزي ما بقول للناس بقول لنفسي، وأنا مقتنعة إني أقف قدام المراية أقول كام كلمة حلوين ليا الصبح، وبالليل قبل ما أنام، خاصة لو محبطة، وعندي جملة بقولها دايمًا انتي جميلة زي ما انتي، بقولها لنفسي ولأي حد.
وأضافت: بدأت أقولها لنفسي من 2016 بعد ما خلفت إسماعيل في الشهر السابع أو التامن ألاقي كومنت انتي تخنتي كده ليه، والفترة دي كان بيجي لي رسايل من بنات مش واثقة من نفسها وعاوزة تنتحر، لكن أنا عندي حتة قوية وبحاول أوقف مع نفسي لما بقع، فيه ناس تانية مش عندهم ده ومش عندهم حد يساعدهم.
وتابعت: فيه ناس بيقولوا لي انتي كده بتشجعي على التخن، لكن أنا مش بشجع علىى التخن أنا بشجع إن كل واحد يحب نفسه، لما تبقي حابة نفسك هتقدري تتعاملي مع الحياة عادي.
واستكملت: أنا كنت رياضية وكنت بدخل بطولات وكنت باليه مائي وكنت المفروض أدخل المنتخب، وكنا ممكن نتمرن عشر ساعات تحت المياه وبعدها بطلت بسبب الثانوية العامة وكنت باكل بنفس الطريقة فضلت شوية مش بتخن وبعدين بدأت أتخن.
وواصلت: مامتي قررت تعقدني في حياتي بسبب التخن وضغطت عليا ودخلت في دوامة إني مش حابة نفسي وثقتي في نفسي قلت وكنت باكل وأتخن.
وأردفت: وبقول لها انتي عقدتيني، ولحد النهاردة بتقول لي انتي تخنتي وده جزء من يومي بيلف حوالين أنا تخنت ولا خسيت، هي مش شايفاني حلوة زي ما أنا وما حببتنيش في نفسي، على الرغم من إنها صاحبتي جدًا وكانت بتعمل كده بدافع حبها ليا، لأنها متعقدة إن صحابها أرفع منها، وقعدت فترة في حياتي مهزوزة، أقرب حد ليا مش مخلياني واثقة في نفسي، علشان كده بنصح الأمهات يخلوا بالهم لأن الضغط على أطفالكم بيخلي ثقتهم مهزوزة.
