بعد اتهامه محمد رمضان بسرقة أغنية على وضعنا.. محمود بدر: كان عارف إنها أغنيتي وخدت إجراء قانوني
كشف المطرب محمود بدر، تفاصيل اتهامه الفنان محمد رمضان، بسرقة كلمات ولحن أغنية على وضعنا، والتي تعاون خلالها لأول مرة مع الفنان أحمد عدوية ونجله محمد عدوية، وطرحها مؤخرًا عبر قناته الرسمية بموقع يوتيوب.
وقال محمود بدر، في لايف مع القاهرة 24، إن مكتب محمد رمضان تواصل معه للحصول على حقوق الأغنية ولكنهم لم يصلا إلى اتفاق، وأنه حصل على تنازل من الشاعر عن كلمات أغنية على وضعنا، مُشيرًا إلى أن المطرب أورتيجا تعاون معه وكانا بالفعل على وشك الانتهاء من تسجيلها.
وأوضح بدر قائلا: الحكاية من حوالي سنة ونص في حد كلمني من مكتب محمد رمضان كان عايز أغنية كان اسمها الأول لسة ماتخلقش ودي متسجلة باسمي ومعايا التنازل، والنجم كان عاجبه كوبليه لسة متخلقش اللي يحاسبنا غير ربنا، ودخلنا في مفاوضات ولكن الموضوع متمش، وقفلنا على كده، ومن 4 شهور شغال عليها أنا وأورتيجا وكنا بنعمل تراك كويس جدًا، لغاية ما تفاجأت أن محمد رمضان نزل الأغنية.
ووجه رسالة للفنان محمد رمضان قائلا: عايز أوجه رسالة لمحمد رمضان، بقوله أنت نجم كبير وأنا بحبك كممثل وفي حتتك، ولكن في الغناء أنا مش عارف أحدد وأقول المغني أو الفنان، ممكن يكون ربنا كارمك بقاعدة جماهيرية كبيرة من التمثيل فأنت خدت ده معاك في الغناء، ربنا يكرمك ويزيدك ولكن إحنا مش معانا القاعدة دي، فلما بنعمل تراك التراك ده بالنسبة لينا شقى ومجهود، أنا وأورتيجا غنينا وتعبنا وفي مهندسين صوت اشتغلوا، وشغالين على الأغنية 5 شهور، وكنا خلاص هنزل الأغنية لقيت أصحابي بيكلموني بيقولولي محمد رمضان نزل الأغنية بتاعتك يوم 2 يناير.
وأكد محمود بدر، أنه بدأ في اتخاذ الإجراءات القانونية ضد الفنان محمد رمضان، موضحًا: محمد رمضان عمل الأغنية مع النجم أحمد عدوية طبعًا والفنان محمد عدوية، فأنا مش عارف أقول إيه لمحمد رمضان ولا أوصله إيه، واحد خد مجهودي وشقايا، ولكن من فضل ربنا عليا خدت الإجراء القانوني، وأول حاجة عملتها إني وقفت الكليب بتاعه على اليوتيوب وعلى جميع المنصات الإلكترونية، وليا الحق إني أقفلها من أولها ولأن قناة محمد رمضان كبيرة فالموضوع أخد وقت في المراجعة.
وأضاف محمود بدر، أن الفنان محمد رمضان كان يعلم بملكيته للأغنية، قائلًا: أنا اشتريت الأغنية دي من الشاعر، ووقتها الشاعر ده كان مع محمد رمضان بيسمعه تراك أنا السلطان، وبعدين قاله أنا بعت الأغنية دي لـ محمود بدر، يعني محمد رمضان عنده علم إن التراك بتاعي، ومدير مكتبه كلمني كتير علشان الأغنية، والتنازل اللي مع محمد رمضان مفيش فيه الكوبليه اللي خده مني.
