سمسم شهاب: مبحبش غناء محمد رمضان.. والمهرجانات تسببت في مشاكل للأجيال القادمة
أعرب المطرب الشعبي سمسم شهاب عن رأيه في غناء الفنان محمد رمضان، مؤكدًا أن المهرجانات تسببت في عدة مشاكل للأجيال القادمة.
سمسم شهاب يتحدث عن غناء محمد رمضان
وقال سمسم شهاب في تصريحات لـ القاهرة 24، إنه لا يحب غناء الفنان محمد رمضان، لافتًا إلى أن النوع الذي يقدمه محمد رمضان لا يصنف غناء، معلقًا: أنا شايف إن غناء محمد رمضان زي ما كل الناس بتشوفه، ومبيعجبنيش غنائه لأن ده مش غناء أساسا
وأضاف سمسم شهاب: محمد رمضان راجل ممثل ونجم كبير، ومش أنا اللي هقيمه كممثل؛ لأنه فنان كبير وموهوب ولكن الغناء له ناسه، ومن تخصص أبدع.
وأكد سمسم شهاب أن لون المهرجانات تسبب في عدة مشاكل كبيرة للأجيال القادمة، على المستوى الثقافي واللغوي، قائلا: أنا شايف المهرجانات زي كل إنسان عاقل ومحترم شايفها، يعني هي كانت السبب في مشكلة كبيرة للأجيال القادمة، مشكلة في اللغة وفي الثقافة والتفاصيل والتصرفات.
وتابع سمسم شهاب: أنا ممكن أعمل ديو غنائي مع مطرب المهرجانات مسلم، بيعجبني صوته وهو بيغني حلو أوي.
وعن شروط نقابة المهن الموسيقية لمطربي المهرجانات، قال سمسم: لو شروط النقابة نفذت ممكن الوضع يوصل للأفضل، بس أنا شايف إن في شروط لم ولن تنفذ لأنهم مش هيقدرو ينفذوها.
واستكمل سمسم شهاب: النقابة مش هي اللي مش هتنفذه، لا مطربي المهرجانات هما اللي مش هيعرفوا ينفذوها لأنهم مش هيعرفو يغنوا بـ فرقة موسيقية، هما بيشغلوا الفلاشة ويغنوا عليها، ودي مشكلة كبيرة لازم النقابة تتنبأ بيها.
