اللا مستحيل
• السطور التالية عن قصة ليس بالضرورة إنها تتوافق مع قيمنا ومعتقداتنا لكن الأهم من عرضها هو التركيز على معناها العام.. من المواقف الإنسانية اللي أخدت صدى كبير خلال الفترة الأخيرة في أوساط أمريكا الجنوبية وتحديدًا في دولة الإكوادور اللي حصل لما قرر الأب "رينيه ساليناس راموس" يعمل أغرب تصرف ممكن راجل في الدنيا يعمله.. "رينيه" متجوز من فترة بعد قصة حب.. للأسف مع الوقت حصلت مشاكل بينه وبين زوجته وكان الانفصال هو الحل الأمثل للطرفين.. عادي وأهو نصيب وبنشوف عشرات إن ماكنش مئات النماذج كده حوالينا كل فترة.. لكن اللي خلّى الموضوع فيه شيء من الصعوبة شوية هو إن حصيلة الجوازة دي كان طفلتين زي القمر!.. المشكلة إن البنتين متعلقين بوالدهم جدًّا والمشكلة الأكبر إن القانون الإكوادوري بيقول إن في حالة انفصال الأب والأم فورًا حضانة الأطفال بتروح للأم.. طب والأب؟.. يشرب من البحر مالوش حاجة.. طب حتى ياخدوا رأي البنات يحبوا يعيشوا مع مين!.. لأ برضه.. الأطفال يعيشوا مع الأم بعد الانفصال.. نقطة ومن أول السطر.. قسوة القانون الإكوادوري كمان بتقول إن حتى لو الأم هتتجوز تاني بعد الأب الأطفال يعيشوا معاها هي وجوزها الجديد.. حتى لو الأب الأساسي عايش لوحده؟.. أيوا بالظبط كده!.. يعني بالبلدي كده القانون الإكوادوري دايس على الأب الإكوادوري يمين وشمال.. "رينيه" أب حنين وعطوف وتعلق بناته بيه مش مجرد تعلق وخلاص لكنه نابع من كونه أب مُحب ومُخلص لأسرته ولبناته فوق الوصف.. وطبعًا مش محتاج تأكيد لمعلومة إن الانفصال كان بسبب تصرفات الأم اللي ماكانتش قد المسؤولية في أي مرحلة من الجوازة.. البنات فضلوا يتحايلوا على الأم عشان تسمح لهم يعيشوا مع والدهم لكنها برضه رفضت بشكل قاطع!.. الواقع اللي إحنا فيه دلوقتي بقى بين نقطتين.. النقطة الأولى أب قلبه بيتقطع يوم بعد التاني من الوحدة لإن بناته بُعاد عنه، وإن وجودهم كان هو اللي بيخليه يقف على رجليه ويستحمل مرار العيشة والوظيفتين اللي ببيشتغلهم.. والنقطة التانية إن فيه بنتين مكتئبتين لا بياكلوا ولا بيشربوا ولا عندهم رغبة يتعلموا لحد ما بقوا زي عيدان الكبريت وعايشين ميتين وهما أحياء بين أم وزوج أم في منتهى القسوة والرخامة.. "رينيه" كان بيدور على حل يحل الأزمة دي من جذورها وفعلًا هداه تفكيره لتصرف غير منطقي بالمرة!.. راح للسجل المدني اللي عندهم في مدينة "أزواي" وغيّر نوعه في البطاقة من ذكر لأنثى!.. إيه الجنان ده!، ونفع أصلًا؟.. أيوا نفع.. البطاقة الجديدة طلعت في خلال ساعات وبناء عليها قدم طلب للمحكمة إن هو كمان كده يعتبر أم للبنات ومن حقه حضانتهم خصوصًا إنه أم مش متزوجة عكس الأم الأساسية اللي اتجوزت!.. المحكمة بقت في حيرة لكذا جلسة لإن الموضوع غريب وجديد، لكن وبعد سلسلة من المداولات تم الحكم لصالح "رينيه" إن البنات يبقوا في حضانته هو!.. "رينيه" في كل حواراته الصحفية المنقولة عنه اتكلم وكان بيشرح أسبابه اللي دفعته عشان يعمل كده بس من ضمن كل الأسباب المكتوبة فوق دي كان فيه جملة بالذات بيكررها في كل لقاء وهي "من أجلهم سأفعل المستحيل".
• مع الوقت الناس بتزيد قسوة، ومش دايمًا هتلاقي اللي يستحق تضحي عشانه لكن بمجرد ما يتوجد هتبقى خاين لو قصرت معاه للحظة، أو ماكنش عندك استعداد تعمل المستحيل لجل تحافظ عليه.. بنقيس أهمية الناس في حياتنا بقيمة وحجم المجهود اللي عندنا استعداد نعمله عشانهم، وبنقيس غلاوتنا عندهم باللي بيعملوه عشان يحافظوا علينا.
