أبرز تصريحات أحمد زعيم مع ياسمين عز: أمي قالتلي ابعد عن المزيكا ومبسوط بتشبهي بمطرب إسباني
حل المطرب أحمد زعيم ضيفًا على الإعلامية ياسمين عز في برنامجها كلام الناس، المذاع عبر شاشة قناة MBC مصر، وتحدث خلال اللقاء عن نجاح أغنيته يا عراف، بجانب الحديث عن حياته الشخصية.
ونستعرض لكم أبرز تصريحات المطرب أحمد زعيم في برنامج كلام الناس:
- أمي الله يرحمها، أغلي حاجة عندي راحت، هي توفت في وقت يعني أنا تقريبًا مكنتش بقدملها حاجة، ومع الوقت أما ربنا يكرمني، ويحصل نقلة فنية أو مادية، بفتكرها وبقول ياربي نفسي كانت تكون عايشة وده مايوفيش حقها.
- أمي قبل ما تتوفى طلبت مني أبعد عن المزيكا، كان السبب عندها علشان الوقت ده مفيش أي حاجة بتجيلي، وكانت بتقولي إنت بتضيع وقت ونفسك، ولكن كنت عارف هي نيتها إيه.
- مراتي بتعذرني كتير عشان هي طيبة وحصل مشاكل كتير بسبب المعجبات وده شيء طبيعي، ومتوقع قدام يحصل كتير وبقولها ده شعاع جاي من بعيد وإنتي لازم تستعدي، ولو نفسيتك وحشة بتأثر عليا وعلى البيت.
- بنتي عندها ماشاء الله التيمبو حلو، ومن وجهه نظري هيبقى صوتها حلوة أوي، في فترة الطفولة ممكن تغني ولكن أول ما تكبر هخاف عليها، أنا كراجل شوفت كتير ما بالك من البنت، حتى المطربات الموجودين على الساحة حصلهم مشاكل وضغوطات كتير.
- أنا واثق كل أب لكل مطربة بيزعل لما بسمع خبر مش كويس، وده حال الأب والأم أنا ليه ادخل بنتي في ليلة زي ديه؟.
- كنت مبسوط بتشبيهي بمطرب أسباني، وكان بيجيلي أسئلة زي أنت هندي أو أسباني أو عراقي، وكل دي حاجات حلوة علشان وصلت لقلوبهم وكل واحد بيشبهني ببلده.
