بعد الهجوم عليها لترك كلبها.. هندية: الناس بيشتموني وبيقولولي يا رقاصة
أعربت الراقصة هندية، عن استيائها الشديد بسبب الهجوم الذي تلقته بعد انتشار فيديو إلقائها كلبها من سيارتها وتركه في الشارع مُصابًا، مؤكدة أنها تتعرض للظلم من الجمهور.
وقالت هندية في لايف مع القاهرة 24، عن التعليقات السلبية التي تلقتها الفترة الأخيرة: نفسي ترحموني شوية لأن التعليقات في منتهى الإهانة، يعني لو أنا ظالمة قولوا حسبي الله ونعم الوكيل، لكن بيشتموني وبيقولوا يا رقاصة، إيه رقاصة دي؟ أنا سايبة الرقص والفن بقالي 22 سنة يعني عيب أوي.
وتابعت: من ساعة وفاة أخويا قدام عيني خوفت وسيبت الرقص والفن، ظلمتوني وأنا بقول مرحبًا بحسنة لم أفعلها، أنتم ظلمتوني بزيادة وأنا باخد حسنات منكم، أنتم بتحاسبوني وبتعاقبوني علشان كنت بصلي فرض ربنا وسيبت الكلب عند السايس؟.
الراقصة هندية
كما قدمت هندية اعتذارًا عما بدر منها في بث مباشر عبر صفحتها بموقع فيس بوك، وانفعالها على الجمهور، قائلة: أنا بعتذر عن كلمة خدامة وأي ست كادحة وبتشتغل على راسي من فوق، هي كانت بس كلمة انفعالية مني وبعتذر عنها جدًا.
وأضافت: أنا انفعلت على الناس لأن سكري علي لما قالولي إنتي كدابة ومفيش حد مصدقني، روحت قُلت يا ستي رميت الكلب وزعقت لأني مش قادرة أستحمل بيتهموني بحاجة مش فيا، على طول بيتهموني والمذيعة والممثلة اللي بيشتموا عليا طيب ارجعولي الأول، لو أنا عملت كده ورميت الكلب بتاعي يبقى أنا ست ظالمة.
